1800/2022-2023
Aizawl, 2nd September, 2022 : Vawiin khan Health Minister Dr R. Lalthangliana’n Synod Higher Secondary School Auditorium, Mission Vengthlangah National Deworming Day, 2022 a hawng.

National Deworming Day puala inkhawm buatsaihah Health Minister chuan naupangte an thanlen kawngah hriselna tha an neih theih nan sawrkarin kawng hrang hrangin hma a la a, chung zinga pawimawh tak pakhat chu rulhut laka naupangte fihlimna hi niin, hemi pual hian National Deworming Day (NDD) kan hmang thin a ni, a ti a. Mihring nuna hun pawimawh ber chu kum 1 – 19 inkar, zirna leh seilenna hun a nih avangin kan puitlin huna kan nih dan tur hriltu pawimawh tak a ni a, taksa pawh enkawl uluka hrisel kan mamawh zual lai a ni, a ti.

Minister chuan rulhlutin naupangte a khawih pawi theih dante sawi langin rulhut pai lo turin kan tih theih awlsam tak a awm a, chung te chu – kut silfai that te, thlai leh thei eitur silfai that te, tui thianghlim chauh in te, ekin tha leh thianghlim taka inthiar te, eitur khuh that te, in leh a vel vawn fai te leh khawlaiah pheikhawk bun thin te hi a ni, a ti a. Health Department bakah School Education Department, Women & Child Development, Rural Development Department leh Public Health Engineering Department thawktu te thawhhona leh thawhrimna avanga National Deworming Day hi hmang thei kan ni a, an chungah lawmthu ka sawi rualin he ni hi hlawhtling taka kalpui a nih theih nan duhsakna sang ber ka hlan a ni, a ti.

Naupang leh zirlai zawng zawngte rulhut laka an lo fihlim theih nan National Deworming Day (NDD) hi India ramah kum 2015 ah khan State/UT 11 ah bul tan a ni a, a hlawknate hmuh a nih hnuin India ram pumah February 2016 atang khan hman chhunzawm a lo ni ta a ni. He hmalakna hi rulhut pai vanga natna hrang hrang thleng theite, thisen tlakchhamnate leh naupang than thu um bona tura ruahman a ni a, kum 1 – 19 inkarte tan kum tin vawihnih (2) rampum huapin a ruala rulhut-hlo (Albendazole) eitirna hun hi kalpui thin a ni.

Mizoramah pawh February 2016 ah khan hman tan niin, round hnuhnung ber April 2022 ah khan naupang sikul kal leh kal lo 96% in he damdawi hi an ei a, vawiin a ei ve thei lo emaw ei hman lo te pawhin an ei ve theuh theih nan September Ni 9, 2022 ah hian Mop Up Day neih leh a ni ang.

He programme National Deworming Day (NDD) hi Mizoram district zawng zawngah a ruala hman a ni bawk a, Sikul kal leh kal lo, sawrkar leh private sikulte pawh a huam vek a, rulhlut hlo “Albendazole” hi sikul ah leh Anganwadi Centre (AWC) ah te a thlawnin a ni ruat bikah hian ei theih a ni.

Dosage for Albendazole 400mg tablet

NDD ACHIEVEMENT, MIZORAM

National Deworming Day, 2022 hawnna inkhawmm hi Dr C. Lalzepuii, DHS, in a kaihruai a, Dr. Lily Chhakchhuak, SPO (RCH) & DD (FW) in NDD chungchanga hmalakna leh thil pawimawh dang sawifiahna hun a hmang a, School Education Department, Women & Child Development Department leh Mizoram Independent School Association (MISA) aiawh ten thusawina hun an hmang bawk a ni.