1799/2022-2023
Champhai, the 2nd September, 2022: Kum 1-19 inkarten rulhut an pai lohna tura rulhut hlo ei beihpui leh rulhut pai avanga nghawng thalote inhrilhhriatna hun, National Deworming Day (NDD), 2022 thawh hnihna, September ni 2 atanga ni 9, 2022 chhunga kalpui tur chu India ram hmun dangte rualin Undivided Champhai District-ah District Level Coordination Committe on National Deworming Day (NDD) ruahmannain vawiin atang khan kalpui tan a ni.

National Deworming Day kaltlang hian District Medical Store, Champhai atangin Damdawiin hrang hrangahte a hlawmin rulhut hlo sem chhuah a ni a. Hemi hnuaia Sub-Centre tinte chuan an bial chhunga School, Anganwadi Centre leh College-ah rulhut hlo hi a hlawmin an pe chhuak leh a. Zirna ina inziaklut lote chu ASHA ten an inah kalchilhin an pe zel dawn bawk a ni. Vawiin atang hian rulhut hlo ei beihpui thawh hnihna hi zirna in hrang hrang leh remchan dan anga kalpui tan a ni a, rulhut hlo ei tura tih ten an ei vek theih nan leh hmaih an awm loh nan thualnawnna, mop up day chu September ni 9, 2022 hian neih a ni ang.

Naupang leh tleirawl/rawlthar zawng zawngte rulhut laka an fihlim theih nan National Deworming Day hi India ramah kum 2015 ah bul tan niin, Mizoramah chuan kum 2016 February thla atangin hman tan a ni a. He hmalakna hi rulhut pai vanga natna hrang hrang thleng theite, thisen tlakchhamnate leh naupang thanthu umbo nana duan a ni a. Kum 1-19 inkarte tan kum tin vawi hnih; April leh September thlaahte ram pum huapin a ruala rulhut hlo ei beihpui thlak thin a ni.

Kumin atana National Deworming Day thawh khatna, April ni 22 atanga ni 27, 2022 chhunga neihah khan Undivided Champhai District chhunga Govt/Govt Aided School 306, Private School 112 leh Anganwadi Centre 277 ah te National Deworming Day hman a ni a. Hemi kaltlang hian target group kum 1-19 inkar mi 49,366 zinga 49,029 te chu rulhut hlo pek niin, target za zela 99.32 (99.32%) te rulhut hlo pek an ni a. A thawh hnihna, vawiin September ni 2 atanga ni 9, 2022 chhunga kalpui hmang hian Undivided Champhai District chhunga kum 1-19 inkar mi 50,324 te rulhut hlo ei tir vek tum a ni.

Rulhut hlo sem chhuah Albendazole Tablet mum khat zel hi 400 mg a ni a. Kum 1-2 inkar tan mum chanve (200 mg) a ei tur a ni a. Kum 2 chin chunglam tan mum khat (400 mg) a ei tur a ni.