1104/2022-2023

Aizawl, the 30th June 2022 : Mizoram hmun dang rualin vawiin khan Khawzawl ah pawh Remna Ni pualin District huapin programme buatsaih a ni a. Deputy Chief Minister Pu Tawnluia, Tuichang bialtu MLA ni bawk hovin he hun hi Zaingen Branch YMA Hall Khawzawl ah hman a ni.

Deputy Chief Minister Pu Tawnluia bialtu MLA ni bawk chuan Khawzawl District mipuite chu Remna Ni chibai bukin a pianna leh seilenna Khawzawl ah ngei he Ni pawimawh tak hmang theia a awm chu Pathian hruaina duhawm tak a ni tiin Pathian hnenah lawmthu a sawi a. Remna Thuthlung Mizoramin kan nei leh remna tluantling kan nei hi Pathianin min pek a ni a, Zoram mipuite min hruaina leh awmpuina a ni, a ti. Remna hlutzia sawiin remna man a to a, a siam kha a hau tak a chuvangin a hlutzia hi kan hriatthar a pawimawh hlein he remna hi mipuiten kan zavaia thawhchhuah ani tih pawh kan hriatthar a pawimawh a ni, a ti. Remna kan sawi rualin ram leh hnam tana an nunna hlan hnam martar-te kan hre reng a, hei aia inpekna ropui a awm lova, zahna chibai kan buk a ni, a ti.

Pu Tawnluia chuan India Sawrkarin Mizoram tana zalenna sualtu te kha hel leh kawhmawh bawl min ti a, mahse keini kha zalenna atan ram leh hnam kohna chhangin kan rammu a, a te emaw a lian emaw awm lovin khang hun laia mi challang tak tak fate pawh an tel a, Mizo zawng zawng kha min kaitho a ni ber a ni, a ti a. Remna Thuthlung kha India Sawrkar leh Mizote inremna a ni a, tute ta bik emaw, tute siam bik a ni lova he remna hi mi zawng zawng ta, Zoram mipuite siam a ni a, kan ngaihhlut zel a ngaihpawimawh a, remna tluang tling kan neih reng theih nan a venghim hi kan zavaia mawh a ni, a ti bawk

Remna Thutlung in a ken tel thil tam tak zingah Mizoram chu state puitling a hlankaia Ram Danpui hnuaia Article 371G a bika venhimna pek a ni te, ram neitu leh a thehthangtu nihna Mizote a pek bakah heng dan hi Parliament dan siam pawhin an tih danglam theih loh te leh ILP khungluh a nite chu Mizote tana thil hlu tak nia a ngaih thu sawiin Mizote kan inhumhim  theihna tur a ni, a ti a. Hmasawnna atana remna a pawimawh zia sawiin rambuai lai nen tun hun tehkhinin thil a danglam nasa tawh a, khaw hrang hrang sawikhawm a Khawzawl a din chhoh hnuah vawiin District Headquarters ani ta te hi remna vang a ni tiin hei hi malsawmna ropui tak a nih thu a sawi.

Programme hi Khawzawl DC Pu C.C. Lalchhuangkima chuan kaihruaiin Rev. David Saithuama Pachuau, Khawzawl Venglai bialtu Pastor in hunserh a  hmang a. Pu K. Roliana, President District MUP chuan Remna Ni awm chhan leh a hlutzia te sawiin hun a hmang a. Pu K. Lalnunsanga, President, Sub-Headquarters YMA in lawmthu sawiin hun a khar a ni.

Deputy Chief Minister hian June ni 28 leh 29 khan a bial chhung Khawhai leh Khawzawl ah te public meeting neiin bial chhunga Sawrkar hmalakna hrang hrang te a sawi a, mipui lam pawhin an mamawh hrang hrangte Deputy Chief Minister hnenah an thlen a ni. Heng meeting ah te hian Khawhai atanga Khawzawl inkal pawhna kawng siam mek anih thu te, Khawzawl leh Biate inkar kawng thawh mek a nih thu te, Sawrkar term chhung ngeia Tuichang bial pumpuiah intinah tui connect pek tura hma lak mek anih thu te, Khawhai tuilaknaah atan cheng vaibelchhe 21 vel ruahman a nih thu te chu a sawi lang a. Bial tana pawimawh tak Riangtlei leh Tuipui inkar Agriculture Link Road pawh ruahman mek anih thu te pawh a sawi lang bawk a ni.

Khawzawl Treasury Office chu hun reilotea hawn anih theih nan hmalak mek anih thu te, Khawzawl ah two wheeler taxi a tlan theih nan ruahmanna siam mek anih thu te, Auditorium cheng vaibelchhe 7 man tur pawh ruahman mek niin multipurpose hall chhawng li tur pawh tender a chhuak tep tawh thu te pawh heng hmunah te hian a sawi a ni.