1105/2022-2023

Siaha; the 30th June,2022: Mizo National Front leh India sawrkarin kum 36 kal ta a, Remna thuthlung(Mizoram Peace Accord) ziaka an Inremna Ni champhaphak vawi 36-na lawmna  hun chu  Mizoram hmun dang te rualin urhsun tak leh ropui takin MYA Multipurpose Hall,New Siaha-ah zinglam dar 11:00Am atanga hman tan a ni a.Pu TJ.Lalnuntluanga Minister of State for Transport,Law &Judicial etc. chuan khuallian niin programme a hman pui.

Khuallian Pu TJ.Lalnuntluanga chuan thu sawiin, MNF movement kha kum 1957 mautamin a hrinchhuah a  ni lo, a hma fe a mizo ten Nationalism a harh tharna an chan lo irhchhuahna a ni, a ti. Khawvel hmun hrang hrangah Inremna thuthlung hi an lo ziak  tawh thin a, MNF leh India Sawrkar  inkara inremna tluka Inremna hlawhtling hi a la awm lo, a chhan chu he Inremna hi Mizoram mipui leh Kohhran hrang hrang te tawngtai chhanna a nih vang a ni.MNF te khan Zalenna an sual sak ber Mizoram mipui ten kan tlin tawh love, tia an ngenna  leh Inremna a awm theih nana Kohhran leh mipui mimir  tawngtaina kha hriain, Remna kawng zawh turin an lo haw ta kha an ni. He Inremna hi Hnam pasaltha tam tak thisenin a luan hnan a nih avangin a hlu tak zet a, Remna Ni hian lawm a phu hliah hliah a ni, a ti. Remna Ni hi tute ta bik mah a ni lo,  Mizoram cheng te ta a ni. Remna Ni in a hrinchhuah zalenna erawh kan hman thiam viau a ngai ang. Freedom of Speech leh Expression te hi kan hman thiam lo chuan, Mizoram chhunga remna leh muanna tibotu hmanrua-ah a chang thei a ni.

Vawiina Remna Ni  lawmna hun kan hman hian kan Hnam pasaltha te tawrhna leh inpekna te min hriat nawn tir se, Mizoram khua leh tui tha ni tura kan mawhphurhna theuh min hriat nawn tir se, mitin inrem taka kan awm zel theih nan inngaidam  tawnna rilru min put tir mawlh rawh se, tiin  Remna Ni pual duhsakna mipui te a hlan a ni.

Vawiin REMNA NI lawmna programme hi district  Bawrhsap Pu Lalsangliana'n a kaihruai a, Rev.VL Ngaia Hlychho,Sr.Executive Secretary,ECM (Hqrs) in hunserh hmangin, Opening song tan  "Ro min rel sak ang che' tih MYA Cultural Club ten an rem bawk.

Pu  H.Malvin,CEM,MADC leh Pu V.Lalchhawna, Signatory to the Declaration of Mizoram Independence by MNF ten thusawina hun an hmang bawk.

Zaithiam Pu John Beizachhi Phuto, Miss B.Priskily leh Pu Lallianmawia ten thusawi karlaka zaiin mipui an awi reng bawk a ni.

Tlawmngai Pawl ten Hnam Lam Special Item an entir hlawm a, MTP,New Colony Branch ten Awkhypa La an entir a,Chhimtuipui Group YMA ten Cheraw Kan an en tir a, YLA Sub-Hqrs aiawhin zaithiam Nula Awiawii'n  Lai hla a sa bawk a ni.

Pu Donny Lalruatsanga,Addl.DC in vote of thanks sawina hun hmangin vawiin programme hi a khar  ta a ni.

Pu TJ. Lalnuntluanga hian tukin zingkarah Siaha Bus Station, New Colony mi tlawhin, hma lam hunah he bus station hmun hman tangkai dan turte thlir ho a ni.MADC Court House pawh tlawhin, Pu TJ. Lalnuntluanga  chuan Council court house tih changtlung tura theitawp chhuah a tum thu sawiin, Mizoram-ah hian  hnam hrang hrang kan awm a, dan hmanga kan Custom leh Tradition, cultural practice leh heritage te hi vawn that a, humhalh a nih theih nan MADC nen pawh inpawh takin kan thawk ho zel dawn a ni, a ti.