1632/2023-2024

Aizawl, the 24th August, 2023: Vawiin chawhma dar 11 khan Deputy Chief Minister Pu Tawnluia, SEDP Executive Board Chairman ni bawk hovin SEDP Executive Board chu Family Oriented SEDP Phase 2 kalpui dan tur chungchanga pawimawh hrang hrangte relin Planning & Program Implementation Department Committee Room-ah an thukhawm.

SEDP Executive Board Meeting chuan kumin September thla chhung hian Family Oriented SEDP Phase-2 hnuaia tanpuina dawng tur ten an dawn kim theih dan tur an ngaihtuah a. Phase-2 hnuaiah hian beneficiary 60,000 huam tura ruahmanna siam a lo ni tawh a, a thawhkhatna kaltlang hian beneficiary-ten tanpuina sum Rs 25,000/- theuh an dawng dawn a ni. SEDP Executive Board Meeting chuan tuna FO-SEDP Phase-1 leh Phase-2 kalpui mek zawh hnuah hian chhungkaw thar 60,000 huam leh turin Phase-3 kalpui leh an rel a ni.

Eizawnna ngelnghet leh hmasawnna siam tura chhungkaw tinzawna duan, Sawkar flagship program pawimawh tak Family Oriented Socio-Economic Development Policy (FO SEDP) kaltlang hian chhungkaw eizawnna bultanna siam sak leh tanpuina pek hmangin Mizoram chhunga mimal leh chhungkua, a tam thei ang ber dimhmun tha zawka hlankai tum a ni a. Family Oriented tih a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh awm theih a ni. Mizoram Sawrkar hnuaia heng Department: Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department-te hnuaiah hian trade item (eizawnna kalpui tur) te thlan theih a ni.

Vawiin SEDP Executive Board meeting-ah hian Mizoram State Planning Board Vice Chairman Pu H. Rammawi, Pu H.Biakzauva, Deputy Speaker, SEDP Executive Board Member MLA te, Planning & Programme Implementation Department leh Finance Department hotute bakah SEDP kalpuitu Line Department hotute an tel a ni.