1631/2023-2024

2023 Thlazing ni 24: Nimin khan Lawngtlai District Level Committee on Pradhan Mantri Aadi Adarsh Gram Yojana (PMAAGY) chu an Chairman, Lawngtlai Bawrhsap Pu H. Lalhmingthanga hovin Lawngtlai DC Conference Hall-ah an ṭhu khawm.

He hunah hian Lawngtlai DRDO Project Director Pi Marilyn Rualzakhumthangi leh Additional Deputy Commissioner Pu Abraham Beirazi Khithie te, line deparment hrang hrang - DEO (Education), CMO leh DLAO te bakah, Lawngtlai Block tana PMAAGY Implementing Agency, Lawngtlai DPO (WCD) leh Sangau Block tana PMAAGY Implementing Agency, Sangau CDPO te an tel a. Financial Year 2023-2024 atana hma lakna tur khaw thlan chhuah (selected village) Village Development Committee-te'n an khaw tana Village Development Plan (VDP) an theh luhte an thlir ho a ni.

PMAAGY hi kum 2021 aṭang khan Ministry of Social Welfare & Tribal Affairs, Government of India hnuaiah kalpui a ni a. Kum 2025-2026-ah chuan India ram pum puia thingtlang khaw thlan chhuah 36,428 (tribal population) te hmasawntir a, developed village-a hlan kai tum a ni a. PMAAGY hnuaia selected village-te hian PMAAGY aṭang hian an khaw hmasawnna tur ₹ nuai 20.38 zel an dawng dawn a ni.

PMAAGY hnuaiah hian Mizoram State aṭangin khaw 344 thlan chhuah an ni a. Khaw 135 tan Village Development Plan hi theh luh fel a ni tawh a; khaw 209 tana VDP siam leh tura hriattirna pawh pek chhuah a ni tawh bawk.

Tun ṭuma Village Development Plan thlir ho tak hi Lawngtlai District-a khaw 58 VDC te'n Financial Year 2023-2024 atana VDP Proposal an theh luh a ni a. Selected village zawng zawngah hian Village Development Committee din a ni a. Implementing Agency leh VDC te hian an khaw tana an mamawhte an zir chian hnuah VDC aṭangin an khaw tana an mamawh nia an ngaihte proposal siamin, District Level Committee-ah thlir ho a ni a. Uluk taka sawi ho a nih hnuin kum 2023-2024 atana Lawngtlai District aṭanga PMAAGY hnuaia khaw thlan bik VDC-te'na Village Development Plan (VDP) proposal an siam chu pawm a ni.