1630/2023-2024

Dated Aizawl, the 24th August, 2023: Vawiin khan CM Conference Hall ah Chief Minister Pu Zoramthanga kaihhruaiin National Bamboo Missions leh Asian Development Bank te tangkawpin Northeast India state pangaa Mau sawngbawlna tihhmasawnna tur hmalakna a kalpui tur; Bamboo Value Chain Development in Northeast, Mizorama kalpui dan tur inrawnkhawmna Mizorama Mau sawngbawlna Industry neitute nen neih a ni.

Chief Minister chuan, tun hma deuh atangin kan rama Mau behchhan Industry ten Furniture lam an hawi deuh vek a. Mahse kan mau neih sate hi an lo tet deuh avangin chutiang atan chuan a lo hman tlak vek chiah si lova, harsatna an tawk ta a ni. Heng kan Industry ten an hman theih tur Mau lian leh chhah chin pun lamah hian sawrkar chuan hma a la mek zel a. Vawiina kan sawi tur National Bamboo Missions leh Asian Development Bank tangkawpten hma an rawn lakna tur bikah hi chuan Pathianin kan rama a dah sa kan maute hman tangkai dan sawi ho turin Industry neitute kan inko khawm a ni, a ti a. Anmahni ngeiin kan mau neih sate hmang tangkaia, a hralhna awm si an hria emaw India ram chhung leh ram pawna Company lian zawkte nena thawh hona mumal tak an kalpui thei dawn a nih chuan sawrkar chuan a theihtawpin a thawhpuiin a tanpui dawn tih a hrilh a ni.

Pu K. Lalthawmmawia, Commissioner & Secretary, Horticulture Department chuan National Bamboo Missions leh Asian Development Bank ten NE state pangaa hmalakna neih an tum dan tlangpui sawifiahin, ‘chain development’ tih a nih angin Industry inringtawn leh eibangnawi nei lo (circular economy, zero waste) awmna tur Integrated Bamboo Development Park din chu a tum ber a nih thu a tarlang a ni.

Meeting chuan Industry kalpui mektute chu Mizorama mau awm sa hmang tangkai tura ruahmanna an neih te a rang lama thehlut turin a ti a. Finish Product emaw Semi- finish Product ang emaw pawh leng vekin Company lian zawkte koh luh leh thawhpuina lam hawi pawh; a hralhna lama harsatna awm lo tur Mau hman tangkaina eng chi pawh rawt turin a ti a ni.

Meeting-ah hian Dr. K. Pachhunga, MLA, Vice Chairman, Bamboo Development Board leh official pawimawhte bakah Mau behchhan Industry panga aiawh hotute an tel a ni.