1629/2023-2024

Dated Serchhip, the 24th August, 2023: Serchhip DC Pu David Lalthantluanga, Competent Authority for Land Acquisition chuan NH-54 kawng laih zauhna atana compensation la tawh, an in la thiat lo te chu Eviction Notice August ni 23, 2023 a tihchhuah hmangin thiat nghal turin a hriattir.

Section 3E(1) of The National Highway Act, 1956 in a sawi angin Competent Authority for Land Acquisition, Serchhip District chuan ram neitute chu ni sawmruk (60 days) chhunga chhuak turin lehkha Memo. No. B. 17011/1/2018-DC SRCP(REV) /293 dt.29.08.2019 hmangin thu a chhuah a. Serchhip District chhunga NH-54, Aizawl-Tuipang kawng laih zauhna atana compensation la tawhte chu an in thiat turin thupek dt.08.07.2023 leh dt.27.07.2023 ah Competent Authority for Land Acquisition chuan a lo chhuah nawn leh tawh a.

Office Order No.K.12011/15/2021-DC(SRCP)/Vol-I Dt.27.07.2023 in a sawi angin Magistrate leh Police te chuan a hmunah kalin an enfiah bawk a. Enfiah a nih lai thlenga in la thiat lo te chu ni 10 (sawm) chhunga thiat tura hriattir nghal vek an ni. Tin, he ni 10 (sawm) chhung hian an thiat ngei em tih chu an khaw Village Council kaltlangin vil zui reng a ni a. NH Branch te chuan phone call in compensation latute chu an in an thiah leh thiah loh an ngaihven zui reng bawk a ni.

Heti chunga sorkar thupek zawm duhlo - in thiat duhlo leh chhuahsan duhlote chu Section 3E(2) of The National Highway Act, 1956 in thu neihna a pek angin Competent Authority for Land Acquisition chuan hma a la dawn a ni. He thupek an hmuh atang hian an in la thiah loh chu thiat nghal tura hriattir an ni a. He thupek zawm duh lo te chu Section 188 of Indian Penal Code hmangin thubuai siam sak an ni ang.