1628/2023-2024

Aizawl, the 24th August, 2023: Vawiin chawhma dar 10:30 khan Sports & Youth Services Minister Office, MINECO-ah 1 (One) Mizo Air Squadron NCC hnuaia Cadet pahnih, kumin Republic Day Camp, New Delhi-a tel pha Cadet Under Officer Kenny Lalrinawma Singh leh Cadet Under Officer Laltlansangi, Pachhunga University College-te leh, Care Taker Officer hna thawk tha pahnih, Care Taker Officer Lalrinsangi Nghinglova, Associate Professor, Govt. Zirtiri Residential Science College leh Care Taker Officer Sanju Karwar, Govt. Diakkawn High School, Kolasib-te lawmpuina leh chawimawina hun Sports & Youth Services Minister Pu Robert Romawia Royte hova neih a ni.

Sports & Youth Services Minister Pu Robert Romawia Royte chuan 1 Mizo Air Squadron NCC Cadet 2 te'n North Eastern Region hminga Republic Day Camp, New Delhi-a tel thei tura intihsiakna hautak tak leh hmachhawn ngaite an paltlang leh, a kentel intihsiakna hrang hranga hlawhtlinna an chang chu chhuanawm a tih thu a sawi a. Anmahni kaihruaitu leh zirtirtute bakah nu leh pate thlawpna chu ropui a tih thu sawiin, naupangte ni chunga hlawhtlinna an chang chuan an kalzelna turah phurna leh chona thar, anmahni mai bakah midangteah a pe thei dawn a ni, a ti. 1 Mizo Air Sqn NCC hmalakna chhuanawm a tih thu leh NCC Cadet-te hlawhtlinna phena sulsutu pawimawh tak Care Taker Officer (CTO) te thahnemngaihna fakawm a tih thu sawiin, CTO hnathawk tha chawimawina hlante chu chhuanawm tiin an hmalakna tha taka chhunzawm zel turin a chah a. Hlawhtlinna changte Sawrkarin chhuanawm a tih thu leh an kalzelna turah duhsakna a hlan thu a sawi bawk.

He hun hi Senior Under Officer Lalmalsawmi chuan kaihruaiin Warrant Officer HZK Vanlalsawma'n report pein inhmelhriattirna hun a hmang a. Minister Pu Robert Romawia Royte in Cadet Under Officer Kenny Lalrinawma Singh leh Cadet Under Officer Laltlansangi te hnenah lawmpuina thilpek Laptop leh Certificate a hlan bakah, Care Taker Officer Lalrinsangi Nghinglova (Best Care Taker Officer in Senior Division/Senior Wing Category, 2022-2023) leh Care Taker Officer Sanju Karwar (Best Care Taker Officer in Junior Division/Junior Wing Category, 2022-2023) te hnenah sumfai Rs 5,000/- leh Certificate a hlan bawk a. Commanding Officer Squadron Leader MK Singh an lawmthu sawiin hun hman hi a khar a ni.

He hunah hian Pu TC Pachhunga, Vice Chairman, Sports & Youth Affairs, Tourism and ICT Board, Dr. Lalrozama IAS, Secretary, Sports & Youth Services Department, Pu Lalnunhlua, Director, Sports & Youth Services Department leh sawm bikte an tel a ni.

1 (One) Mizo Air Squadron NCC hi May ni 11, 2011 khan Aizawlah din a ni a. Hlawhtlinna hrang hrang dawng tawhin zirna in 25, College 6 leh High School 19 ahte kalpui niin, tun dinhmunah hian NCC Cadet 1800, Senior Division/ Senior Wing 300 leh Junior Division/ Junior Wing 1500 te an awm mek a. Kum 2022-2023 chhung khan Cadet 17 te chuan Sawrkar laipui hnuaia buatsaih camp EBSB, Trekking, Para Basic Course, Air Force Attachment Camp, All India Vayu Sainik Camp leh Republic Day Camp-te State pawnah an chhim a. Heng zinga ngaihhlut hlawh ber Republic Day Camp, New Delhi-a neihah Mizoram atangin NCC Cadet 2, vawiina chawimawina hlante hi NCC Directorate, North Eastern Region aiawhin an tel a ni.