Vawiin khan Deputy Chief Minister Pu Tawnluia, PHE Department changtu ni bawk chuan MINECO a, a Office Chamber-ah thianghlim leh faina beihpui thlakna Clean India programme peng pawimawh tak Swacch Survekshan Grameen 2019 (SSG 2019), faina leh thianghlimna kawnga thingtlang khuate dinhmun leh inelna nipahfawm programme a hawng.

Deputy Chief Minister Pu Tawnluia chuan a ram angin India hian faina leh thianghlimna kan veiin, kawng hrang hranga Sawrkar, pawl leh khawtlang angten hmalakna hrang hrang neiin a pawimawhnate kan hre chho zel chu a lawmawmin, Mizoram-ah pawh nasa takin hemi kawnga hmasawnna kan neih te chu lawmawm a tih thu a sawi a. PHE Department leh UD &PA Department te chu Swacch Bharat, Clean India programme kengkawhtu, mipui zirtirtu an ni mai a, mahse he programme a taka tihlawhtling thei chu khawtlang, pawl, chhungkua leh mimal te an ni a, kan zawn theuhah faina leh thianghlimna kawngah mawhphurhna kan nei vek a ni tih hi kan hriat theuh a ngai a ni tiin he programme a lo hlawhtlina a ram fai leh thianghlim, mipui hrisel kan nih theih nan sawrkar programme hi theihtawpa tawiawm turin mipuite ka sawm cheu ni, a ti a. Mizorama tlawmngai pawl – YMA, MHIP leh a dangte an tangkai thu sawiin faina leh thianghlimna kawngah hian an thawhhlawk hle a ni, a ti.

Programme hi Pu F. Liantluanga, Chief Engineer(Headquarters & Water Resources) in kaihruaiin SSG-2019 chungchanga hriattur pawimawh leh a chanchin tlangpui chu Pu H.C. Lalnunzira, Director, WSSO in a sawi a ni.

India rama chengte fai leh thianghlimna (Sanitation) lama hma an sawn theihna turin India sawrkar chuan kum 1986 atang khan hma a lo la tan tawh a. Kum 2014 a tang khan Swachh Bharat Mission hming vuahin nasa zawkin hma ala chho ta a. He programme hi thuanghnih: thingtlang (Rural) leh khawpui (Urban) ah te then niin Thingtlang (Gramin) hi PHED in a enkawl a, khawpui (Urban) hi UD&PA Department lamin an enkawl thung a ni. He programme ina a tin zawn ber chu, 'chhia leh tha hriatnain miten fai leh hrisel duhna thinlung an nei ang a, phut leh beisei awm lovin hriselna atan an thawk dawn a ni' tia kalpui a ni, hei hi 'Mission Mode' an ti a ni.

He programme hian a tum ber chu kumin October ni 2, India hnampa Mahatma Gandhi piancham vawi-150-na a thlen ni hian India ram chuan India Fai (Clean India) a thleng hman tur a ni tih hi a ni.

He hmathlir nei chung hian sawrkar chuan rampum hi faina leh thianghlimna (Sanitation) in a tuamchhuak hman ngei tur a ni tih te, tun kan dinhmun aia hmasawn tur leh khawlaia inthiar awm lo (ODF) turin theih tawpin hma a la a ni.

Faina kawnga State leh District-te thawh that dan hre turin tehna thuhmun hmangin India ram pumpui tan Ministry of Jal Shakti, Department of Drinking Water & Sanitation chuan 'Swachh Survekshan Grameen 2019' chu a lo buatsaih ta ni.

Faina dinhmun endik tur hian India Sawrkar chuan 'IPSOS, Research Private Limited' chu a thlang a. Mizoram atangin khaw 176 endik tur a thlan a ni a. District endik tur atan district pakhat Siaha District thlan a ni bawk. Khuaah kalin endik tur anih dawn avangin hnathawh a awlsam theih nan lo tawiawm that a pawimawh hle dawn a ni.

He 'Swachh Survekshan Grameen - 2019' hi August ni 14 khan New Delhi-ah Pu Gajendra Singh Shekhawat, Hon'ble Union Minister, Ministry of Jal Shakti-in a hawng tawh a. State tinte hawnna hun hmang tura a ngen angin, vawiin khan Mizoram tan he programme hawnna hi neih a ni. 

Attachment

  • Loading attachment...