Vawiin chawhma khan Aijal Club, Aizawl ah 24th State Geological Programming Board Meeting neih a ni a Pu Vanlalvuana, Deputy Secretary, Commerce & Industries Department chuan he thutkhawm hi a kaihruai a, Director, Geology & Mineral Resources, Geological Survey of India, Central Ground Water Board, Central Water Commission, Mineral Exploration Co. Ltd., Oil India Ltd., UD & PA, PHE, PWD Pushpak, Agriculture department leh line department dang aiawhte an tel a ni.

Chairman Pu Vanlalvuana chuan State Geological Programming Board thutkhawm chuan rah tha a chhuah ngei a beisei thu sawiin,” Member ten kan theihna zawn theuh a kan lo tawn hriat tawhna atangte, kan thiamna leh ngaihtuahna te Mizoram tan hmasawnna thlen thei tur ni a kan hriatte chu thahnemngaitaka he board kaltlanga thawh zel turin ka sawm che u a ni,” a ti.

Vawiin thutkhawmah hian Directorate of Geology and Mineral Resources Mizoram, GSI-NER(Tripura-Mizoram Circle), Central Water Commission, Mizoram University, IBM-NER, Land Revenue & Settlement Department, PWD, ONGC leh OIL ten Mizoram chhunga an hma lak leh hmachhawp tar lanna hun an hmang a meeting a rel tur thupui hrang hrangte sawi hona hunin a chhunzawm nghal bawk a ni.

24th State Geological Programming Board Meeting ah hian GSI-Tripura-Mizoram Circle chuan National Landslide Susceptibility Mapping (NLSM) kalpui mek chu Field Season 2019-20 chhunga peihfel hman a beiseiawm thu an tar lang a, Serchhip-Thenzawl inkar, Mat lui bulah Meso-Scale Land Slide Zonation study pawh neih tur a ruahman anih thu tar lan a ni bawk. Directorate of Geology & Mineral Recources hmalakna hnuaiah Minor Minerals Exploration and Exploitation Programme West Phaileng a kalpui dan turte, NH-54 Sairang leh Kawnpui inkara Geotechnic and Landslide Investigation te, Lushaicherra (Thinghlun) leh Rotlang a Coal Exploration chungchangte vawiin thutkhawmah hian sawi ho a ni.

Field season 2018-19 chhung khan Directorate of Geology & Mineral Resources hnuaiah Mining permit dilte a hmun a endik 3, Quarry atan a hmun endik 76, Mining permit renew dilna endik 13 te neih a ni a, Mineral concession permit thar pekchhuah 132 leh permit renew 501 a awm bawk a ni. Sandstone atangin Rs. 23,839,568, Sand atangin Rs. 6,343,039 leh brick atangin Rs. 11,181 chhiah hmuh a ni a Petroleum Exploration Licencing Fee atangin Rs. 245,12,000 hmuh a ni bawk.