No.6793/2020-2021

Aizawl, the 7th December 2020 : Vawiin khan Deputy Chief Minister Pu Tawnluia, Urban Development & Poverty Alleviation changtu ni bawk chuan CS Conference Room MINECO ah thuthar thehdarhtute hmaah Aizawl Municipal Corporation (AMC) a Municipal Commissioner hna chelh mek Pu K. Laldingliana chu AMC inthlanna kalpui theih anih hma chuan AMC enkawltu Administrator atana Sawrkarin a ruat thu a puang a. Press Briefing ah hian Deputy Chief Minister hi Commissioner & Secretary, Urban Development & Poverty Alleviation Dr. C. Vanlalramsanga leh UD & PA Director Pu H. Lianzela ten an tawiawm a ni.

Press Briefing ah Deputy Chief Minister Pu Tawnluia chuan AMC Board of Councillors thlan chu COVID-19 hripuiin min la chenchilh zel nia a lan avangin State Election Commission chuan a hun taka inthlanna an buatsaih thei dawn lo tiin thu an thlen thu a sawi a. Hripui len avangin Local Council leh Village Council te pawh a hunah inthlanna buatsaih theih a nih loh avangin tum hnih lai Sawrkarin an hun a pawtsei a, he inthlanna hi thla 4 lai a khawtlai hnuin August ni 27 ah inthlanna chu neih a ni a, Mahse hripui vang bawkin Aizawl khawpuia veng engemawzatah a hun ruatah inthlanna hi kalpui thei a ni lovin, September thlaah an inthlang ta a ni, a ti a.Hetiang hi thil anih avangin leh tunah AMC dinglai mek hun term chu naktip December ni 9 zanlai dar 10 a tawp mai dawn avangin ruahmanna siam a tul ta niin a sawi a.

Sawrkarin he thil hi uluk tak a ngaituah thu sawiin India rama Municipality dan hrang hrang an zirchianaah “Extension” hun pawhsei hi a la awm ngai lo a, an term a zawh hnua inthlan a theih loh pawhin Administrator emaw Board of Administrators ruat an lo ni thin a. Hetiang dan hi The Mizoram Municipalities Act, 2007 hnuaiah pawh kan nei a. Hetiang a nih tak avangin he dan section 13(6) in State Sawrkar thuneihna a pek angin “Adminstrator” ruat a lo tul ta a ni, a ti.

Pu Tawnluia chuan uluk taka Sawrkarin a ngaituah hnu in AMC a Municipal Commissioner hna chelh mek Pu K. Laldingliana chu Adminstrator a ruat nise tiin thlulukna Sawrkarin a siam tih a sawi a. Inthlan kalpui theih anih hma chu Administrator niin AMC a enkawl tur thu a sawi a. Sawrkarin AMC Administrator atana Pu K Laldinglaina ruat thu Sawrkar hriattirna vawiina chhuah chu a chhiar chhuak bawk a ni.