No.2547/2021-2022

Aizawl 8th October 2021: Vawiin khan Pu Tawnluia, Deputy Chief Minister hoin Aizawl Municipal Corporation (AMC) chuan Faina Hapta – 2021 (Cleanliness Week - 2021) kharna hun Chanmari YMA Hall, Aizawlah an hmang a. He hunah hian Pu Lalrinenga Sailo, Aizawl Mayor chu khual zahawm a ni. Pu C. Lalmuanpuia, MLA & Chairman, Vety & Fisheries Development Board pawhin he hun hi a hmanpui.

Pu Tawnluia chuan dan angin Faina Hapta chu khar ni mahse faina kawnga hma kan sawn theih nan, hmalam atana ke min pen tirtu, a bul tanna niah hmang theuh turin kalkhawm te a chah a. Faina leh thianghlimna lam hawi hmasawnna rahbi thara min hlangkaituah kan hmang tur a ni, a ti. Fai hi a mawi a, a hrisel a, changkanna leh hmasawnna a keng tel bawk a ni, Deputy Chief Minster chuan a ti a. AMC ten bawhhlawh thliar leh sawngbawl kawngah nasa takin tan an la mek a, a hlawhtlin theihna turin mimal leh chhungkaw tin te pawhin mahni in theuhah kan bawlhhlawh kan thliar hran a pawimawh hle a ni, a ti. Faina leh thianghlimna kawnga hmasawn zel turin mipui te he hunah hian Deputy Chief Minister chuan a sawm bawk a ni.

Khual zahawm Aizawl Mayor Pu Lalrinenga Sailo chuan hun kaltawh te ngaihtuah chuan faina kawngah Aizawlin hma a sawn hle a, tan lak erawh kan la ngai nasa, a ti a. AMC chuan khawpui fai kan neih theihna turin inchhungkhur leh kawtthler tihfai duh tawk mai lovin lui kawr leh kawm kar a fai tel theih nan tan a la, a ti. Hualngohmunah bawlhhlawh sawngbawlna hmun siam tum a ni a, sum pawh dawn a ni tawh tiin Tuiriala hman tur sawrkarin bawlhhlawh sawngbawlna tur hmanrua incinerator lian chi AMC hnenah a pe tih Mayor chuan a sawi a. Khawpui hmasawnna tur leh faina turin AMC chuan theihtawpin tan a la a, a rah chhuah hmuh tur pawh a awm chho zel a ni, a ti bawk.

India Zalenna Ni (Independence Day) kum 75-na denchhenin Azadi Ka Amrit Mahotsav kal zelah Swachh Bharat Mission (Urban) hnuaiah March ni 12, 2021 atang khan faina kawngah hmalakna chak takin kalpui tan a ni a. August ni 15, 2023 thlengin India ram pumah faina kawnga hmalak beihpui hi neih a ni dawn a ni. He mission atana hmalaknaah hian Mizoram Sawrkar chuan October ni 2, 2021 atanga October ni 8, 2021 chhungin Faina Hapta (Cleanliness Week - 2021) a kalpui a. Aizawl Municipal Corporation pawhin Faina Hapta chhung hian nasa takin Aizawl khawpui a fai lehzual theihna turin hma a la a ni.

Cleanliness Week pual hian photography leh videography competition bakah Best Coverage by Newspaper Competition buatsaih a ni a. Photography ah hian pakhatna B Lallawmkima, Zotlang; pahnihna Michael Zothanmawia, Dawrpui Vengthar leh pathumna William Lalrindika, Chhinga Veng ten lawmman an dawng a. Videography-ah Lalrindiki Ralte, Tuikhuahtlang; B.Lallawmkima, Zotlang leh Reuben Lalmalsawma, Venghlui te chuan lawmman pakhatna atanga pathumna an dawng a. Chanchinbu ah Virthli Daily chu pakhatna niin pahnihna chu Hlimthla, Lunglei; pathumna Lenrual, Champhai an ni.

October ni 2, 2021 khan Faina Hapta hawn a ni a, hemi ni vek hian mipui vantlang hriat turin chanchinbu leh Social Media ah te faina kawnga inzirtirna theh darh na hun hman nghal a ni.

October ni 4, 2021 khan Awareness Campaign nei in, Local Council zawng zawng hnenah, tlangauna hmanga Mipui zirtirna kalpui chhunzawm a ni a.

October ni 5, 2021 khan Aizawl Municipal huam chhungah chhungtin ten an in leh a chhehvel tih fai hnatlang an nei bawk.

October ni 6, 2021, khan No Tolerance Day on Waste Disposal hman niin hemi ni hian a hmun loa bawlhhlawh paih te bakah khawlaia chîl chhak mai mai te, a hmun ni lo a zungte chu Solid Waste Management Bye-Laws hmangin hrem an ni.

October ni 7, 2021 khan, Cleanliness drive hman niin, Sorkar Office, Sumdawnna hmun leh Biak In te tih fai hnatlang runpui hman a ni bawk.

Faina intihsiak kalpui zel niin November ni 30, 2021 thlengin intihsiakna hun hi hawn a ni ang a, result hi nakum Republic Day-ah sem a ni ang.

Attachment

  • Loading attachment...