No.7658/2020-2021

Nizan khan Deputy Chief Minister Pu Tawnluia'n Vanapa Hall-ah CYMA Kumpuan 'Zirna Uar' infuih tharna programme buatsaihah khuallian niin hun a hmanpui a, he hunah hian Kumpuan hlawhtlinna tur atana CYMA lehkhabu buatsaih 'Kailawn' tih chu a tlangzarh nghal a ni.

Deputy Chief Minister Pu Tawnluia chuan Kum 2019-21 chhung Kumpuan atana YMA in ZIRNA UAR an puang chu ama mimal leh Sawrkar tan pawh thil lawmawm tak nia a hriat thu sawiin Kumpuan hlawhtlinna atana hrileng karah pawh YMA Branch hrang hrang ten tha thlah lo in hma an lakna te leh Branch tam tak in zirlai harsa ten zirna an chhunzawm ve theihna atan zirlai harsa te chhawmdawl hna nasa taka an thawk chu ropui a tih thu a sawi.  YMA inkhaidiat hrang hrang Central/Sub-Hqrs/Group/Branch ten Zirna Uar Kumpuan hlawhtlinna atana hmalakna tur chanvo leh tihtur hrang hrang ruahmanna felfai taka an duang chu lawmawm tiin hei hian rah tha a chhuah ngei ka beisei hle a ni, a ti bawk.

Deputy Chief Minister chuan Sawrkar chuan zirna lamah hmasawnna chu a ngaipawimawh hle tih sawiin Chief Minister leh Education Minister te hmalakna in zirtirtu in daih lo lutuk phuhruk nan kum hnih chhungin Zirtirtu 1600 zet lak an nih thu te, Hindi Teacher pawh 540 lak an nih thu te a tarlang a. Sawrkarin National Education Policy zirchiang tura a din Study Group leh Expert Committee ten he thil hi an zirchian mek a, kan hnam leh sakhua mil a NEP ah kan sengluh leh kan hman (adopt) theih dan tur an zir chiang mek a a ni, a ti.  

Pu Tawnluia chuan zirna tluangtlam bakah eizawnna atana pawimawh thei co-curricular activity te leh kut themthiamna zirtir lamah nasa zawka hma la turin CYMA a chah a. Khua leh tui tha nitur leh khawtlang tana mi hmantlak chherchhuah in tuma hma inlakna hi ram hnukkhawih diktak a ni tiin eizawnna bakah Central Service thleng phak tura YMA in Zirlaite tanlak tir tuma ke in pen hian Sawrkar nasa taka puiin a tha tihchak na tur a ni, a ti bawk.  Ram leh hnam vei chungin Zirna kalpui ila tiin ram siamthatnaah zirlai te hi an pawimawh ber a ni tih chu zirlaiten hre reng turin a chah tel bawk a ni.

Deputy Chief Minister hian CYMA buatsaih, Mizo mithiam hrang hrang mi 12 te thuziak zirlaite fuih leh kaihruaitu thei tur thu tangkai tak tak dah khawm lehkhabu 'Kailawn' tih chu a tlangzarh bawk a. A bial chhunga YMA Brach hrang hrang te sem turin bu 100 a lei a, programme senso atan cheng 20,000 CYMA a pe bawk a ni.

Thusawitu dang CYMA President Pu Vanlalruata chuan Zirna Uar tih hian zirna pangngai piah bakah eizawnna leh intodelhna atana pawimawh themthiam zirna skill development te chu a huam thu te leh heng hi a ngaipawimawh avangin a thei ang angin CYMA in skill development lamah pawh tan leh hma a lak dante a sawi a ni.  

Programme hi CYMA Vice President Tv. Lalhmachhuana in a kaihruai a, CYMA General Secreatary Prof. Lalnuntluanga hnen atangin Kumpuan bawhzui dan leh hma lak dan hrang hrang te ngaihthlak a ni a. Lehkhabu thlirlawkna leh thuziaktute hnena lawmthu sawina thilpek hlanna chu CEC Member leh Secretary, Kumpuan Sub-Committee, CYMA Er. Lalrinmawia'n a nei a. Hun tawp kharna chu CYMA Treasurer Pu Fabian Lalfakawma'n a nei a ni.

Programme hi CEC Member te bakah Aizawl khawpuia, Branch YMA hrang hrang aiawhten an chhim a ni.