No.2445/2021-2022 

Aizawl the 2nd October, 2021 : Vawiin khan Deputy Chief Minister Pu Tawnluia chuan India ram zalenna kum 75-na lawmna, Swachh Bharat Mission kum 7 tlin lawmna, Faina Hapta vawi 45-na leh Mizoram Fai Inelna vawi 5-na chu Aizawl City Park-a programme buatsaihah a hawng a. Pu L.Thangmawia, MLA; Pu H. Lalzirliana, MLA; Aizawl Deputy Mayor Pu R.Thanglura leh mi pawimawh dangte an tel a ni.

Pu Tawnluia chuan kumin faina hapta thupui atan “Faina - kan in leh a chhehvel atangin” tih a nih angin faina hi mimal leh chhungkua atanga tan tur a ni, a ti a. Sawrkar, khawtlang hruaitu, tlawmngai pawlte leh media ten fai leh thianghlim kawnga zirtirna an au chhuahpui a tul a; faina hi mimal leh chhungkuate nen kan zavaia kan mawhphurhna intawm a ni, a ti.  Mizoramah faina kawnga hma kan sawn theih nan kawng hrang hranga hmalakna kalpui mek hi a hlawhtlinna tur chuan thu mai ni lovin mipuiin a taka kan chantir a ngai a, fai leh thianghlim hi nunphung pangngaia kan neih a tul tawh a ni, a ti a. Fai duhna leh thianghlim tumna a awm loh chuan heng programme buatsaihte hi a hlawhtling tak tak thei dawn lo a ni, Deputy Chief Minister chuan a ti.

India Prime Minister chuan nimin khan Swachh Bharat Mission II a hawng a. India ram pum huap faina endikna People First tih thupui hmanga neih tur Swachh Suvekshan, 2022 chu September ni 27 khan hawn a ni bawk a. UD&PA hian vawiin atangin Mizorama khawpui 28-ah faina beihpui hi an thlak tan a, Mizoram Khawpui Fai intihsiakna ‘Mizoram Cleanliness Competition vawi 5-na’ kalpui a ni zui nghal dawn a ni.

Vawiin programme-ah hian kalkhawm ten thutiam rualna (pledge taking) an nei a. Mizoram Cleanliness Competition 2021 Guidelines te, IEC merchandise te leh Cleanliness Week Media Campaign te chu Deputy Chief Minister Pu Tawnluia hian a tlangzarh bawk a ni. Week hawnna hi Mizoram khawpui 28-ah neih vek a ni a. Ministry of Housing and Urban Affairs duhdan angin Mizoram puma sanitation worker mi 548 te hnenah chawimawina Scroll of Honour pek an ni dawn a, vawiin khan Aizawl khawpui chhunga sanitation worker thenkhat hnenah hlan tawh niin, khawpui tinah khawtlang mi langsar ten an hlan vek dawn a ni.

Sanitation Worker thawk tha ber mipa leh hmeichhia thlanchhuah Pu Rinawma leh Pi Lalbiakmawii hnenah Best Sanitation Worker chawimawina hlan an ni a. Bawlhhlawh sawngbawl kawnga ti tha ber Best Local Council for Waste Segregation dawngtu Chawnpui Local Council hnenah chawimawina hlan a ni bawk. Self Help Group hrang hrang ten bawlhlawh atanga thil mawi siamchhuah “Waste to Art Exhibition” an nei a, a duh apiangte tan lei theihin he hunah hian an pho chhuak bawk a ni.

Swachh Bharat Mission (Urban), Mizoramin a huam chin khawpui 23 chu kum 2017 Open Defecation Free an ni tawh a. Tunah hian ODF+ ni turin tan lak a ni leh mek a. UD&PA Director Pu H.Lianzela tarlan danin Mizoram chhunga Village Council leh Local Council zawng zawng tan nimin khan SBM Local Ambassador mi 241 appointment tihchhuah a ni a, heng mite hi faina lama sulsutu an ni dawn a ni. He Faina Hapta chhung hian hmalakna hrang hrang duan zingah aurinna leh local media hmanga inzirtirna kalpui te; khawchhung leh vengchhung tihfai hnatlang neih te; no tolerance day for open waste disposal (a hmun ni lova bawlhhlawh paih leh khawlaia chilchhakte dan anga hrem an ni ang) te; sawrkar pisa, sumdawnna hmun leh sakhaw biakna hmun tihfai te; photography leh mobile video clip insiamsiak te neih a ni dawn a. Best Newspaper for Coverage on Cleanliness/Sanitation thlan an ni dawn bawk a ni.