No.2444/2021-2022 


Aizawl 2nd October, 2021 : India Hnampa, Mahatma Gandhi piancham puala kumtina neih thin, Faina Hapta, 2021 hawnna chu tukin khan Charkawn, Mamit-ah Dr. Lalrozama, IAS, Mamit District Bawrsap chuan khuallian niin a hawng.

Khuallian chuan faina leh thianghlimna kawnga DUDO leh Sanitation Frontline Workers te hmalakna fakawm a tih thu sawiin khawtlang hruaitute'n theihtawp an chhuahna chu lawmawm a tih thu a sawi a. Thianghlimna chu rilru atanga intan tur a ni tiin thinlung leh rilru chhungril a thianghlim chuan thil dang pawh a rawn inrem fel mai dawn a ni a ti. Rilru leh taksa thianghlimna atanga tan a, kan khawtlang leh a chhehvel thlenga faina kalpui turin Mamit mipuite a chah a ni. 

Pu C. Sawihlira, DUDO, Mamit chuan kumin Faina Hapta puala hmalakna leh hapta hman chhunga faina kawnga inelna tur hrang hrangte report a pe bawk. 

He hunah hian VC te'n UD&PA, Mamit-a an thehluh, an veng chhung theuha faina lama thawk tha leh thawhhlawk lawmman hlan niin hmeichhia-ah Pi Laltharzeli, Mamit Bazarveng leh mipa-ah Tv. Lalrongenga, Chhimveng te'n lawmman an dawng a. Hei bakah hian Cleanliness Week hmalakna atana Waste to Art Exhibition neih taka lawmman te semna neih nghal niin lawmman pakhatna hi Lalremkimi Mamit Venghlun-in dawngin pahnihna hi Buannel Home Mamit-in an dawng a. Lawmman pathumna hi H. Lalchhanhima, Field vengin a dawng a ni. Lawmman atan hian Citation bakah pawisa fai hlan an ni a, Waste to Art Exhibition a tel zawng zawngte hi Participation prize pek vek an ni bawk. 

Faina hapta hawnna hun hi Pu H. Rodingluaia, Chairman, Jt. VC Mamit-in a kaihruai a. Pi LR Zampuii, Sub Hqrs MHIP, Mamit chuan kalkhawmte faina thutiam sawi rualtirna neiin Pu Vanlalchhuanga Chhangte, Sub-Hqrs YMA chuan lawmthu sawina a nei a ni. 

Faina Hapta hawnna hi Mamit khawpui bakah Zawlnuam Town, West Phaileng leh Kawrthah khuaah te hman a ni bawk.

Attachment

  • Loading attachment...