1568/2022-2023
Khawzawl, the 12th August 2022: Tukin dar 7:00 khan Dy. Chief Minister Pu Tawnluia, Tuichang Bialtu MLA ni bawk chuan Khawzawl Zaingen Branch MUP Run a hawng. Dy. CM hi Pu C.Lalmuanpuia, MLA, Veterinary, Fishery & Sericulture Board Vice Chairman chuan a tawiawm a ni.

Pu Tawnluia chuan Zaingen MUP te puala inkawmhlimna tur hmun tha tak MUP Run hawn fel a ni ta chu lawmawm tiin, tunhma lama hun a hman pui thin thian thate nena inhmukhawma hun hmanho a ni chu nuam a tih thu leh lawmawm a tih thu a sawi a. Kum a lo tam hian upate hian inkawm khawmna hmun kan mamawh a, kan sawi duh zawng leh kan ti ti tui ber chu kan vanglai hun sawi khawm a ni a, chutiang sawia kan awmkhawm chuan kan hlim thin a ni, a ti. MUP ten chhiatniah Darkhuang kan vaw thin leh pawndum kan han bat thin pawh hi i ngaipawimawh zel ang u, a ti bawk.

Deputy CM chuan sawi chhunzawmin kum upa lamte hian taksa vawnfai leh kan incheinaah pawh kan in uluk thar a pawimawh a, vunte a lo chuar a, inchei mawi kan mamawh a, tan la thar zel ila, thalaite pawhin kan nu leh pa te, kan pi leh pute cheimawi kawngah tan i la thar zel ang u, a ti a. Kan kum a upa a nih pawhin huphurh nei lo ila 'ka ti thei a lawm' tih i ching ang u, a ti a. Vawiin Khawzawl District-a pianni a Khawzawl Zaingen Branch MUP Run kan hawng thei hi a chhinchhiahtlak hle a ni a ti bawk. Pu Tawnluia hian Zaingen MUP te hi an lo inkawmhlimna tur Carrom board leh Chinese Checker a pe a, MUP Run-ah hian Tui Connection a tih sak tur thu a sawi bawk a ni.

He inkhawm hi Pu HP. Chhawntluanga, President, Zaingen Br. MUP in a kaihruai a, Pu K.Lalzika, Secretary-in technical report a pe a, Pu K.Lalthanzama, Zaingen Br. MUP Adviser-in lawmthu sawiin hun a khar a ni.

MUP Run hmun hi Rs 30,000 in Zaingen Branch YMA in an leisak a ni a, Building sak bultan nan hian BDO atanga hmalakpuina, bialtu hmasa Pu Lalrinliana Sailo in MLA Fund Rs 50,000 a pek bakah, Pu Tawnluia'n Rs 3,00,000 a pe bawk a, heng bakah hian tanpuina leh sum hmunhna dangte bakah member-te thawhkhawm tlingkhawm atanga sak a ni a. MUP Run sak nan hian hnatlang vawi engemaw zat neih a ni bawk.