No.3495/2021-2022

Aizawl, the 22nd December 2021: Vawiin khan Deputy Chief Minister Pu Tawnluia chuan a pisaah “Pathian leh kan ram tana ka tawn leh rah chin” tih lehkhabu, Pu K.Zothanmawia, Mission Veng ziak a tlangzarh.

Pu Tawnluia chuan hnam zalenna sualnaa mi huaisen, pasaltha te zinga miin ama thil tawn leh paltlang ngei lehkhabua a ziak chhuak chu lawmawm a ti a. He lehkhabu ziaktu Pu Zothanmawia hi kum 19 a nih laia Mizo hnam sipaia lut, kum 19 zet ram tana ram mu, a vanglai hun tha zawng zawng Mizo hnam tana hlantu a ni, a ti. Pu Tawnluia chuan Mizoram leh Mizo hnam venhim leh than zelna tura humhim hi vawiin thlenga kan mawhphurhna a ni, a ti a. He ramin mi dangte ruala ke a pen a, Mizo hnam chu hnam zahawm leh changkanga siam tura ke pen puiah mipui te a sawm a ni.

Thangtharten Mizo hnam tana rammu te inpekna an hlamchhiah thiang lo tih sawiin “Pathian leh kan ram tana ka tawn leh rah chin” tih lehkhabu chu thangthar a tam thei ang berin chiar se, ram hmangaihna leh ram tana theihtawpa ke pen tura inpekna thar an neih theihna tura chawkphurtu leh fuihtu a nih a beisei thu Deputy Chief Minister chuan a sawi a ni.

Vawiin programme hi Pu David Zohmangaiha, Ward XVII Councillor chuan a kaihruai a. Mizo Academy of Letters Finance Secretary Pu Lalhmingmawia Ralte chuan lehkhabu thlir lawkna hun hmangin, lehkhabu ziaktu Pu K.Zothanmawia’n lawmthu sawiin hun hnung a khar a ni.