No.3496/2021-2022
Aizawl, the 22nd December, 2021: Thlai leh thei tharchhuah metric ton 10 (sawm) vawn that theihna Solar Cold Storage chu Tuichang Assembly Constituency bialtu MLA Pu Tawnluia, Deputy Chief Minister ni bawk hmalaknain nimin khan a dahna tura ruat KVK Khawzawl phurh thlen a ni a, vawiin atangin a siamtu company service engineer ten a bunfel hna an thawk tan a ni.

Solar Cold Storage Khawzawla dah tura ruahman hlawhtlin theih nana project siam leh khawl (technology) hi Mizoram Science, Technology & Innovation Council (MISTIC) bultum niin, a dahfel pawh hi Aizawl atangin thawktu thenkhatin an tawiawm a. Khawl rawn thleng hi Pu C.C. Lalchhuangkima, Deputy Commissioner, Khawzawl District kaihhruainain Pu Lalrohlua, Additional DC leh khawtlang hruaitututen lo dawngsawngin a dahna tura ruahmanah an dahlut a. Khawl hi a rih tham avangin motor atanga hlan thlak leh dahsawn nan NH-6 kawng zauh hna thawk mektu Shri Balaji Construction Company khawl hman a ni.

Department hotute hnen atanga thu dawn danin Khawzawla Solar Cold Storage dah hi Mizoramah chuan a hmasa ber leh a lian ber tur a ni a. Hemi atan hian MISTIC chuan Sawrkar laipui, Department of Science & Technology hnuaia North East Center for Technology Application and Reach (NECTAR) atanga cheng nuai 22 (sawmhnih pahnih) dawngin, buaipui ngai dang a phurhna man leh a chhunga thlai/thei dahna tur chhuar (crates) siamna turte hi Deputy CM in MLA Fund atangin a ngaihtuah a ni.

Solar Cold Storage hian a vawnthat theih zat a tam dawn avangin thlai leh thei tharchhuak nasa Khawzawl District mipuite tan a tangkai hle dawn a. Ni zung chakna hmang tur a nih dawn avangin electric power a heh dawn lo a ni. Khawl bunfel hna hi MISTIC kaihhruaina hnuaiah a siamtu company engineer ten an thawk a. Bunfel hnua a enkawl chhunzawm (maintenance) hna chu KVK Khawzawl mawhphurhna a ni thung dawn a ni.