No.3497/2021-2022
Aizawl, the 22nd December, 2021: Vawiin khan Mizoram Science, Technology & Innovation Council (MISTIC), Directorate of Science and Technology te buatsaihin National Mathematics Day, 2021 lawmna hun Mizoram Rural Bank Auditorium, MINECO-ah neih a ni. He hun Er. H. Lalsawmliana, Chief Scientific Officer leh Member Secretary, MISTIC kaihhruai hi Pu Lalmalsawma Pachuau, Secretary, Planning Department-in a hmanpui.

Planning Secretary Pu Lalmalsawma Pachuau chuan Mathematics pawimawh zia hre tur chuan a tum chiang taka zir a tul tih a sawi a. Competitive exam hrang hranga tling thei tura Mathematics pawimawh zia sawiin Mizoram Mathematics Society te leh MISTIC ten zirlaite Mathematics an tui chhoh zel nana an hmalaknate chhunzawm zel turin a fuih bawk.

Er. H. Lalsawmliana chuan National Mathematics Day lo pianchhuah dante leh Mizorama hemi ni puala lawmna leh Mathematics tih lar nana programme neih a nih thu a sawi a. Dr. Davy Lalruatliana, Scientific Officer leh Coordinator, MISTIC chuan National Mathematics Day puala programme hrang hrang Mizorama neih dan report-na hun a nei. He programme-ah hian Mizote zinga Mathematics subject-a Doctoral degree nei tharte chawimawina hun hman niin, chawimawina thuziak hlan an ni.

Vawiin programme neihah hian Mizoram Mathematics Society (MMS) leh MISTIC ten kum tina an lo huaihawt thin State Level Mathematics Competition lawmman semna hun hman a ni a. Pawl 5, 8, 10 leh 12 a inelna huaihawta tithate hnenah chawimawina thuziak leh sumfai hlan an ni.

National Mathematics Day 2021 pualin Pu C. Lalngaihawma, Assistant Professor, Govt. Kolasib College hnen atangin thupui ‘Understanding Mathematics’ tih hmangin thusawi ngaihthlak a ni a. He Ni lawmnaah hian Science NGO hrang hrang te, Science Promotion Wing (SCERT) te, Mizoram Remote Sensing Centre te, Mizo Innovators te bakah sawmbik dangte an tel a ni. Pu Samuel Lalmalsawma, Senior Scientific Officer chuan lawmthu sawiin National Mathematics Day, 2021 lawmna programme a khar a ni.