No.3498/2021-2022
Aizawl, the 22nd December, 2021:Vawiina DONER Ministry Consultative Committee thutkhawmna Parliament Annexe-a neihah MP(LS) Pu C. Lalrosanga chuan Lawngtlai District-a Hmawngbuchhuah thleng relkawng siamna tur atana survey lo neih tawh anga hmalak zui zel a tul thu a sawi.

Pu C. Lalrosanga chuan kilometre 223-a thui ni tura chhut Sairang atanga Hmawngbuchhuah thlenga relkawng siam tum hi Kolodyne Multi Modal Transit Transport Project nena inzawm zel thei tura ruahman a nih angin Mizoram tan a tangkai theih hle dawn avangin hmalak chhunzawm zui ngei nise tiin DONER hotute chu a hrilh.

DONER Minister Pu G Kishan Reddy chuan Prime Minister thahnemngaihnain India hmarchhakah relkawng siamna cheng vaibelchhe 39,000 senna tur hna hrang hrang thawh mek a nih thu a sawi a. Relkawng tur leiverh 122 verh mekah 27 verh zawh tawh a ni a ti. Motor kawngpui laih hna cheng vaibelchhe 85, 000 chuang senna tur hmarchhakah thawh mek a ni a ti bawk.

Pu C. Lalrosanga chuan Mizorama khualzin hip luhna tur ruangam tihchangtlun zel a tul thu leh mau hman tangkaina dap zui zel a tul thu DONER hotute chu hrilhin, hmarchhak state-te tana central sawrkar ministry leh department 54-te sum ruahman zaa 10, Gross Budgetary support atana cheng vaibelchhe 68,000 chuang tun sawrkar kuma ruahman a ni chu lawmawm a tih thu sawi a. DONER Minister chuan he sum dah hi a tangkai thei ang bera hmanral tum a ni a ti.

Pu C. Lalrosanga chuan ramri hrul hmunte ngaih pawimawh a tul thusawiin India telecom company-ten ramri hrul hmunahte inbiakpawhna lam an tihphuisui a tul takzet a ni a ti bawk.