No.3499/2021-2022
Aizawl, 22nd December, 2021 : Vawiin khan Health Minister Dr. R. Lalthangliana hovin SAD Conference Hall, MINECO-ah Mizoram COVID-19 dinhmun thlirho a ni a, he hunah hian Home Minister Pu Lalchamliana, MOT Chairman Dr ZR Thiamsanga, Chief Secretary Dr Renu Sharma, DM&R Secretary Pu Vanlalngaihsaka, Health Secretary Pu R. Lalramnghaka bakah Aizawl bawrhsap, Health Department, DIPR, Home, ZMC hotute telin, IMA, MOT, MKHC, Jt. NGO Coordination Committee leh Aizawl City Local Council Association aiawhte an tel bawk a ni.

Vawiin meetingah hian State-Level Expert Team on COVID-19 Management (SLETOCOM) te chuan COVID-19 variant thar Omicron chungchang sawifiahin khawvel ram 100 chuangah hmuhchhuah a nih tawh thu leh India ramah pawh State 10 ah case 200 chuang hmuh a nih tawh thu an sawi a, USA a COVID-19 positive an neih mek zinga 73% chu Omicron an nih thu sawiin, khawthlang ramte an ralkhel a, Europe ram thenkhatah chuan lockdown an puang hial a, he hrik thar hi a thawkna lo anga hriat ni rih mahse Delta variant aiin a let thum laia inkaichhawn a awl avangin a thlamuanthlak loh a, hri kai kan tam viau chuan inenkawlna hmun leh khawl ten a daih lo thei a, a hlauhawm nep tihna a ni lo a ni, an ti a. COVID Appropriate Behaviour kan zawm that loh chuan kan dinhmun a tha lo leh viau thei a ni, an ti. Mizo zingah co-morbid condition (zunthlum, thisen sang etc) nei kan tam avangin kan fimkhur a ngai takzet tih an sawi a ni.

Omicron hmuhchhuah a nih hnuah India ram pawn atanga Mizorama lo haw mi 139 an awm tawh thu sawiin, Lengpui Airport ah RAgT test an nih bakah sawrkarin ruahmanna a lo siam tawh angin fimkhur leh uluk taka khunghran an nih thu meetingah hian tarlan a ni a, rawn haw zinga mi pahnih – Singapore leh Australia atanga lo haw te RAgT positive an ni tih Lengpui Airport ah hriatchhuah an ni a, ZMC ah dah nghal niin an swab sample pawh Genomic Sequencing turin Kolkata-ah thawn a nih thu tarlan a ni a, an dinhmun a ngaihtuahawm lova, tun kar chhungin an test result hriat a beiseiawm tih sawi a ni a. ZMC a Genomic Sequencing Laboratory ah pawh trial run neih a nih tawh thu leh an test result te National Institute of Virology (NIV), Pune a thawn mek a nih thu tarlan niin, phalna pek an nih hma chu official-a Genomic sequencing tih theih a nih rih loh thu tarlan a ni.

IDSP Nodal officer Dr Pachuau Lalmalsawma report danin tun thla December ni 1 – 21 inkar hian chawhrualin nitin positive thar 197 hmuhchhuah ang a ni a, December ni 13 – 19 inkara positivity rate hi 7,2% a ni a, WHO inkaihhruaina siamah positivity rate 5% aia a hniam hma chu hripui leng hi thunun tawh anga ngaih theih a ni lo a ni.

Tun dinhmunah Mizoram pumah COVID Care Centre (CCC) 23, khum 1476 awm theihna a awm a, Community COVID Care Centre (4C) 88, khum 2628 awm theihna a awm bawk a, Dedicated COVID Health Centre (DCHC) 20, khum 332 leh ICU 2 awmna leh Dedicated COVID Hospital (DCH) khum 306 leh ICU khum 48 awmna a awm mek a ni.

COVID-19 vaccine hi Mizoramah chuan dose 13,15,032 pek chhuah tawh a ni a, 1st dose la hi 94% ni tawhin full dose la hi 76% an ni. 1st dose la chin hi national average ah 86% a nih laiin Mizoramah chuan Mamit District (72%) leh Lawngtlai District (85%) in national average an la phak lova, full dose ah hian national average 53% a nih laiin Mizoramah chuan leh Lawngtlai District (47%) in national average an la phak lo a ni.

Vawiin meeting chuan kumin hunpui vuakvetah mitin fimkhur tur leh COVID Appropriate Behaviour zawm tha turin an ngen a, Task Force duty leh Executive Duty te thahnemngai taka thawkchhuak tura ngenin, hripui kan inkaidarh leh lohnan mi zawng zawng mahni hmun theuhah fimkhur taka khawsa turin an chah a ni.

Vaccine lak kim vek a nih theihnan theihtawp chhuah thar leh a tul thu tarlan niin, District tinah ICU khum 5 tal dah a nih theihnan hmalak a ngaih thute sawi a ni a. Private damdawi in thenkhatin negative test result an report lo nia lang chu ngai pawimawhin kan positivity rate hriltu a nih avangin uluk takin report pe kim thlap thlap thin se an duh thu an tarlang bawk a ni.