Sawrkar laipui Ministry of Urban Development (2017 kum atanga Ministry of Housing and Urban Affairs tiha koh) kaltlanga cheng nuai 2418 senga sak Lena Sports Stadium, Lunglei chu vawiin khan Deputy Chief Minister leh UD&PA Minister ni bawk Pu Tawnluia’n a hawng. He hunah hian Agriculture Minister Pu C. Lalrinsanga, Sports Minister Pu Robert Romawia Royte, HPC Vice Chairman Pu Lawmawma Tochhawng te chu khualzahawm niin MYC Chairman Dr Vanlaltanpuia, Dr K. Pachhunga, MLA, Pu C. Lalmuanpuia, MLA, sawrkar official-te, tlawmngai pawlte, media mite, Sports Association-te, khawtlang hruaitute leh mipui thahnem tak an kalkhawm.

Hawnna inkhawm UD&PA Department Secretary Dr. C. Vanlalramsanga kaihhruaiah Deputy Chief Minister chuan Sports Stadium changtlung tak Lunglei in a neih theihna tura hun leh tha leh ngaihtuahna seng tu zawng zawng te chungah lawmthu sawiin neitu rilru pu chunga duat taka enkawl zui turin mipuite a chah a. Infiammi te hmakhua ngaiin sawrkarin nasa takin hmalak chhunzawm zel a tum a, Sports lama inkaihhruaina mumal tak Mizoram Sports Policy 2019 pawh neih tawh niin Sports kaihhnawih hmasawnna ruhrel te pawh a tul anga ruahman chhunzawm zel a ni ang, a ti a. Sawrkar leh private company hna te Mizoramin kan indaih tawhlo avangin mizo thalaite hnathawh tur hrelo leh changlo an tam hle a, hengte hian an thiamna (skills) leh an tui zawng (interest) hmangin eizawnna kawng an dap a tul a ni tiin khawvel changkang chho zelah Entrepreneurship leh infiamna te hi thalaite tan eizawnna a tling tawh a ni, a ti a.

A Department chan hnuaia hmalakna kal mekte pawh sawilangin UD&PA kaltlangin khawpui hmasawnna tur mamawh hrang hrang hengte Community Hall, Sports Stadium, multi storey building, bawlhhlawh sawngbawlna (solid waste management)-te ruahman chhunzawm zel a nih tur thu a tarlang a. Aizawl khawpui traffic jam ti ziaawm tura UD&PA kaltlanga sawrkar hmalakna kal mek Parking House Support Scheme (PAHOSS) chu Lungleiah pawh kalpui thuai tum a nih thu a tarlang bawk. Tin, PHE Department kaltlangin Lunglei khawpui leh a chhehvelah tui hnianghnar zawka semchhuah a nih theihna tura Mat Lui tui pump chhuak tura hmalak mek niin cheng vaibelchhe 400 hu Detailed Project Report (DPR) chu DoNER ah thehluh a nih tawh thu a sawi a. Lunglei khawpuiin a mamawh em em tuihawk luan kawr/tui chhe paihna changtlung tak ruahman turin Asian Development Bank (ADB) kaltlanga hmalak tum a nih thu a tarlang bawk. 

Lena Sports Stadium sakna ram phal taka pe tute Lena thlahte chungah lawmthu sawiin a nih tur ang ngeia mipui ten tangkai taka an hman theinan duhsakna a hlan a ni.

He huna khualzahawm Agriculture Minister Pu C. Lalrinsanga pawhin thu sawiin Mizote a hnam anga kan lansarh chhoh ve na chu Games and Sports lamah a ni tiin infiamna kaltlangin thalaiten eizawnna ngelnghet an neih theih bakah kan hnam tih hming thatna kawng pawimawh tak pakhat a ni, a ti a. Infiammi te nunah taimakna leh mahni inthununna a pawimawh takzet avangin Sports kaltlang hian kan thalaite nun thui takin kan siam tha thei a ni, a ti a. Lena Sports Stadium chu amah leh amah intodelh thei tura kalpui ni se tiin a enkawltute hnenah thurawn a pe a ni.

Khualzahawm Sports Minister Pu Robert Romawia Royte chuan Mizoramin infiamna hmunhma te kan indaihloh hle laiin Sports Stadium changtlung tak peih fel a ni leh ta chu mipuite, a bik takin infiammi te tan malsawmna ropui tak a ni tiin Mizoram sporting fraternity aiawhin a ti hlawhtling tu te chungah lawmthu a sawi a. Sports lama inkaihhruaina mumal tak Mizoramin a neih thar Sports Policy 2019 kaltlangin infiamna discipline hrang hrang tih hmasawn tum a nih thu leh Mizoram thalai tam zawk ten Sports hmanga eizawnna an neih theihna tura hmalak zel anih tur thu a sawi a. Mizoten sports discipline thenkhat kan tuipui em em laiin National leh International Level-a medal tamna athletics discipline hrang hrang te kan uar tawk lova, hemi lamah hian tan kan lak thar a ngai a ni tiin Mizoram State Games karleh maia neih tur hi hemi kawnga bultanna a ni, a ti a. Lena Sports Stadium, Lunglei chu thalaite, a bik takin infiammiten tangkai taka an hman ngei a beisei thu sawiin a enkawl chhunzawm pawh Sports & Youth Services Department  kutah dah ni se a duh thu Sports Minister hian a sawi a ni. 

Khualzahawm HPC Vice Chairman Pu Lawmawma Tochhawng chuan Lena Sports Stadium hawn a ni chu Lunglei District tan ni chhinchhiah tlak tak leh hmasawnna mellung pawimawh tak a ni tiin thalai infiamniten tangkai taka an hman ngei a beisei thu a sawi a. Stadium-in a thil la mamawh belh te Sports Minister-in hriatpui tur leh hmalak pui tura sawmin Zobawk State Sports Academy pawh zawhfel a nih thuai theihnan hmalak puiah a sawm a ni.  

Pu Joseph H.Lalramsanga, Director UD&PA-in Technical Report a pe a. Lena Sports Stadium hi Sawrkar laipui Ministry of Urban Development (2017 kum atanga Ministry of Housing and Urban Affairs tiha koh) kaltlanga cheng nuai 2418 senga sak a ni a. Project hi MoUD 10% Lumpsum Scheme for NE States kaltlangin 24/09/2013 khan sanction a ni a. Project hi 16/05/2014 ah tan niin 30/10/2019 ah khan zawhfel a ni a. Football Field 90x60 metre a zau artificial turf phah leh 8 lane Synthetic Runnin track a awm a. Mi 1000 lenna Public Gallery leh mi 500 lenna VIP Gallery bakah VIP Room, Press Room, Parking, Public Toilet, ticket counter leh Guard Room, Stadium tih enna compuound lighting, dressing room, Fencing, tui supply, drainage leh a panna kawng laih te he project ah hian a tel a ni.

Lunglei DC Pi K.Lalrinzuali’n lawmthu sawina hun hmangin Pu Lena fapa Pu P. Lalbiaka leh Serkawn VCP atangin thusawi ngaihthlak a ni.

Lena Sports Stadium hawnna inkhawm hi ropui taka hman niin BHSS Junior Section ten Mass Drill leh Aerobics an entir a. Zaithiam Lalenkawli Pautu leh Vuantea ten mipuite an awih bakah Government Higher Secondary Pipe Band ten show an nei a. Scred Heart HSS leh Baptist HSS zirlaiten Stadium hawn lawm nan Exhibition Match an khel bawk a ni.