Khawzawl Road Protection Squad chuan a vawikhatna turin tukin khan Khawzawl khawpui chhunga kawngpui dinhmun te an enfiah.

Tukin dar 7:00 atang khan Khawzawl Road Protection Squad te hian Khawzawl SDO (Sadar) Pi S.T. Lalvensangi hovin Khawzawl khawpui chhung kawngpui dinhmun an enfiah a. Kawngpui ti cheptu - kawngsir a in sakna bungrua dah te, kawng bul hnaih lutuk a tuizem leh thildang dah te chu seng hawi turin a neitute chu an hriattir a. Hei bakah hian kawngpui Area chhunga lungrem te pawh thiat a, siam tha turin in neitute an hriattir nghal a ni.

Khawzawl khawpui chhungah hian in sa thar turten kawngpui an nek chep lohna turin Khawzawl District Bawrhsap Pu H. Lianzela chuan tunhnai khan in sa thar tur reng rengte chu D.C. Office-ah dilna thehlut a, Road Protection Squad leh an awmna veng Village Council ten an enfiah hnuah chauh in an sak theihna turin Order a lo ti chhuak tawh bawk a ni.

Tukina Khawzawl Road Protection Squad in Khawzawl khawpui chhung kawngpui dinhmun an enfiahnaah hian BDO Pu Saithangpuia Sailo bakah Khawzawl Joint VCP, Khawzawl Joint YMA President te leh Member dangte an tel tha hle a, veng hrang hrang an kalnaah hian veng Branch YMA hruaitute leh VC ten an lo tawiawm zel a ni.