Krishi Vigyan Kendra (KVK), Khawzawl bultumin vawiin khan khawvel hmundang rualin Khawzawl khawpuiah World Soil Day hman a ni a, KVK Farmers Training Hall a World Soil Day puala hun hmanah hian Khawzawl leh Tuipui khua atangin loneitu engemawzat an tel a ni.

Vawiin chawhma dar 11:00 a KVK Farmers Training Hall a World Soil Day puala hun hman hi KVK Scientist Pi R. Vanlalduati (Soil Science) in a kaihruai a. KVK Head & Senior Scientist Dr. Henry Saplalrinliana chuan, Mihringte hian thildang chu inthleng kual thei mah ila kan chenna, kan ram leilung hi chu kan inthleng ve thei lo a ni tiin tuna lei chung hang tha luangral tur kan ven hian kan tu leh fate tan thil tha kan hnutchhiah a ngai a ni a ti a. Loneitute hlawhtlinna turin leilung a pawimawh ber tih sawiin kan lei a that loh chuan taimakna in awmzia a nei lo thei a, thawhrimna in beisei ang hlawhtlinna a thlen zo lo fo thin tih a sawi a. Mihringten kan hriselna dinhmun hre tura kan in check up thin ang hian kan leilung dinhmun hre turin Soil Sample la a, kan endik a tul a ni a ti a, loneitu kalkhawmte chu midangte pawh an leilung dinhmun hre tura Soil Testing neih pawimawhzia hrilhhre ve turin a ngen nghal bawk.

Khawzawl Addl. DHO Pu Lalengzuala pawhin thu sawiin kum 2013 atangin World Soil Day hi hman tan a nih thu a sawi a. Lei chunglang hang tha te a luanral mai lohna turin loneitute chu an lo leh huanah te Terrace lai a, Terrace lai thei lo te pawh changkham turin a chah a. Ramthar zuan a kumtina ramngaw thiah hian kuthnathawktute thian, leilung leh thlai te nena inkaihhnawih nungcha pawimawh tak takte kan suat zel a ni tiin huan lo ram nghet neih a pawimawh thu a sawi bawk.

Vawiina Khawzawl a World Soil Day puala hun hmanah hian loneitu 40 telin KVK Scientist te leh loneitute hian inkawmhona hun an hmang bawk a, hun hman zawhah loneitute hnenah hian a thlawnin thlai chi hrang hrang chi an sem a ni.