Deputy Chief Minister Pu Tawnluia leh amah zuitute chu nimin chawhnu dar 3:15 khan Lunglei lo thlengin Lunglei DC leh official-te leh party hruaituten Kawmzawl Helipad ah anlo hmuak a. Lunglei HPC Conference Hall-ah Leitlangpui Rahbi 2019 Award Ceremony a hmanpui zawhah nimin tlai dar 6 khan Deputy Chief Minister chuan Lungleia Chanchinbu mite chu HPC Vice Chairman Office Chamber-ah kawmin Press Meet a neih pui.

Press Meet ah hian Lunglei District MJA member thahnem tak kalkhawmin Agriculture Minister Pu C. Lalrinsanga, Sports Minister Pu Robert Romawia Royte, HPC Vice Chairman Pu Lawmawma Tochhawng, MYC Chairman Dr Vanlaltanpuia, Bamboo Development Board Vice Chiarman Dr K. Pachhunga, MLA, Vety & Fishery Development Board Vice Chairman Pu C. Lalmuanpuia, MLA, Lunglei DC Pi K. Lalrinzuali leh DIPRO Pi C.Lalremruati te an tel a ni.

Pu Tawnluia, Deputy CM chuan sawrkar hi mipui ta a ni a, mipui tan din a ni tiin langtlang leh zep ruk awm lova thawk tura buatsaih leh thawk mek a nih thu a sawi a. Sawrkarin decentralization of power a ngaih pawimawh thu sawiin mipuite hnena thuneihna tam zawk pek sawrkarin a duh a, Lungleiah pawh mamawh dan leh a tul angin Municipal board/Council kalpui turin kawng a inhawng a ni, a ti. Village Council-te pawh thuneihna tam zawk leh mawhphurna sang zawk pe turin sawrkarin ruahmanna a siam mek thu a sawi bawk.

Sawrkar flagship program SEDP chungchang pawh sawiin Dy. CM chuan he hmalakna kaltlang hian mahni ram leilung ngei atanga intodelhna neih chu sawrkar tum bulpui ber a nih thu a sawi.

Press mi te hian Deputy CM leh midangte hnenah zawhna zawtin inkawmhona hun tha tak an hmang a. Lunglei Traffic jam leh traffic police indaihloh chungchang te pawh Deputy CM hnenah hian thlen niin Aizawl khawpui traffic jam ti ziaawm tura UD&PA kaltlanga sawrkar hmalakna kal mek Parking House Support Scheme (PAHOSS) chu Lungleiah pawh kalpui thuai tum a nih thu Deputy CM hian a tarlang a ni.