Nimin tlai khan Deputy Chief Minister Pu Tawnluia chuan Lunglei HPC Conference Hall-ah Lunglei District huam chhunga business idea intihsiakna ‘Leitlangpui Rahbi’ Competition ti tha tlanchhuah Entrepreneur sawmpanga (15) te hnenah lawmman a hlan. He hunah hian Agriculture Minister Pu C. Lalrinsanga, Sports Minister Pu Robert Romawia Royte, HPC Vice Chairman Pu Lawmawma Tochhawng, MYC Chairman Dr Vanlaltanpuia, Bamboo Development Board Vice Chiarman Dr K. Pachhunga, MLA, Vety & Fishery Development Board Vice Chairman Pu C. Lalmuanpuia, MLA te bakah sawrkar official-te, HPC member-te, media-te leh sawm bik dangte an tel.

Leitlangpui Rahbi 2019 Award Ceremony, Lunglei DC Pi. K. Lalrinzuali kaihhruaiah Deputy CM Pu Tawnluia chuan Lunglei District tana entrepreneurship intihsiakna hlawhtling tak buatsaihtu Planning & Programme Implementation Department leh HPC Lunglei te a lawmpui takzet thu sawiin entrepreneurship hmalakna chu hun lo kal zel turah changtlung leh tha zawka kalpui a nih theihnan duhsakna a hlan a. Mizo thalaite zingah entrepreneurship lama tui tak tak, mahni kutkawiha dinchhuah tum, mi tum ruh leh beiseiawm tam tak a hmu chu lawmawm a tih thu sawiin ‘Entrepreneurship’ chu Mizoram tan hmasawnna khawlpui (Engine of Growth) a la ni ngei dawn a ni, a ti a. 

A sawi zel naah Deputy CM chuan sawrkar leh private company hna te Mizoramin kan indaih tawhlo avangin mizo thalaite hnathawh tur hrelo leh changlo an tam hle a, hengte hian an thiamna (skills) leh an tui zawng (interest) hmangin eizawnna kawng an dap a tul a ni tiin Entrepreneurship lama hma la duhte sawrkarin a thlahthlam dawnlo a ni, a ti a. Hlawhtling turin educational qualification a pawimawh ber lo a ni tiin sumdawnna thinlung pua mahni thiam zawng leh tui zawnga eizawnna kawng dap thiam te, taimak, tumruh leh teirei peihte chu hlawhtlinna kawng zawhna atana thil pawimawh a ni zawk, a ti a. Mizoten kan thil chin thalo chu thawk si lova sum hmuh kan tum a, rim tak leh hah taka thawhte hi remhre lo riau ah kan ngai thin a, hei hi kan kalsan thuai a tul a ni tiin entrepreneurs-te chu awlsam taka hlawk tum lova taima leh chhel taka hma la turin a chah a. Hlawhchham hlau lo tur leh beidawng lo tura thalaite fuihin a tira hlawhchhamna anga lang pawh hlawhtlinna kawng inhawnna pawimawh tak a ni thei zawk tih hre turin a chah a ni.

He hunah hian Lunglei HPC Vice Chairman Pu Lawmawma Tochhawng pawhin thu sawiin Leitlangpui Rahbi 2019 hlawhtlinna tura hma la tu leh bultumtu Planning & Programme Implementation Department-te chungah lawmthu a sawi a.  Leitlangpui Rahbi 2019 chu a bul tanna chauh a ni tiin hun lo kal zel turah zau zawka hmalak tum a ni, a ti a. Leitlangpui Rahbi 2019 a dilna thehlut tu mi 857-te chungah pawh lawmthu sawiin mi heti zatin buisness idea neiin entrepreneurship lama hmalak an tum chu Lunglei District tan thil lawmawm tak a ni, a ti a. Lawmman dawng tura thlanchhuah entrepreneur 15-te chu hlawhtling ngei tura theihtawp chhuah tura chahin Mizoram chhim lama entrepreneurship ti hmasawn zel turin mawhphurna sang tak an nei tih hre reng turin a chah a. Harsatna an neihah te HPC leh Planning Department hnuaia mithiamte rawn hreh lo turin a chah bawk.

Dr C. Vanlalramsanga, Secretary, Planning & Programme Implementation Department & Chief Judge, Leitlangpui Rahbi chuan powerpoint presentation hmanga report pein Leitlangpui Rahbi 2019 tobul leh hmalak dan tlangpui a sawifiah a. 

Leitlangpui Rahbi 2019, Micro Start Up Capital Competition hi kumin 6th June, 2019 khan Mizoram Chief Minister Pu Zoramthanga’n a hawng a. He intihsiakna hi Planning Department hnuaia Mizoram State Entrepreneurship Development Monitoring Committee (MEDMOC) kaihhruainaa kalpui niin a tum ber chu mahni kutke a ding tura tumna leh duhna neite, sumdawnna "idea" nei te tana Business Idea hmanga intihsiakna buatsaih a ni a. Sumdawnna idea ti hlawhtling turin a project a zirin Rs.2.50 lakhs thleng tanpuina dawn theih a ni. Lunglei District mipuiten he intihsiakna hi an hlut hle a. Sumdawnna tan mek tawh leh sumdawnna "idea" nei mi 857 lai in application thehlutin an zinga mi 172-te hi Lunglei town area pawn lam ami te an ni a. Applicants zawng zawng te hi Planning Department mithiamte leh Master Trainer-ten an interview vek hnuah, finalist mi 86 thlanchhuah leh an ni a. Heng Finalist te hi 22/08/2019 ah Boot Camp neih pui an nih hnuah Planning Secretary Dr C. Vanlalramsanga kaihhruaiiin 17th – 18th October, 2019 khan interview neih leh niin mi 15-te chu an sumdawnna idea tihlawhtling tura puihna dawng tura thlanchhuah an ni. Final Result-hi 28th November, 2019 khan tih chhuah a ni. Dr C. Vanlalramsanga chuan Lunglei District chu Mizorama entrepreneurship lama hmahruaitu  ‘Start Up District’ ni thuai tura a beisei thu a tarlang a ni. 

Pu C. Vanlalmuana, Chief Planning Officer, HPC chuan lawmthu sawina hun a hmang bawk.

Leitlangpui Rahbi 2019, Micro Start Up Capital Competition lawmman dawngtute chu a hnuaia tarlan te hi an ni:

1. C. Lalhmangaiha, Electric Veng, Lunglei. Leitlang Pictures (Online Mizo Movies)

2. C. Lalramluahpuia, Electric Veng, Lunglei.  OG Food Truck

3. Ramdinmawia, Haulawng.  VB Ecofriendly Production- Bamboo Products

4. H. Lalengmawia, Cherhlun. H&T Farm (Piggery)

5. F. Lalramnghinglova, Theiriat, Lunglei. Fanai Bee Farm

6. Laltanpuii Hnamte, Zohnuai, Lunglei. Cafe 02

7. R.Vanlalzami,  Lunglawn, Lunglei. Baw Bawih Homemade Pickle & Fruit

8. Sangkhuma Khiangte, Upper Lungrang S. Goat Farming

9. P. Lalromawia,  Tarpho. Jo Jo Onion Farm

10. R. Lalrinmawia, Bazar Veng, Lunglei. Raymond School of Music

11. Vanrammawii Chawngthu, Bazar Veng, Lunglei. Le Blue Cafe

12. F. Zohmingliani, College Veng, Lunglei. FIFA Refree Training Academy

13. M. Lalpekmawia, Hnahthial Peniel. Mualhlun Hood Works

14. H. Vanlalruatfela, Zobawk. RC Bag Works

15. C. Lalduhawma & C. Lalsiamliani, Lunglawn, Lunglei. Tuition Classes

 

Attachment

  • Loading attachment...