Zana current eng hnuaia Rajiv Gandhi Stadium-a inkhelh theihna tur floodlight vuah chu Sports Minister Pu Robert Romawia Royte-in ni 3.12.2019 zan khan a hawng. Pu Robert Romawia Royte chuan, Rajiv Gandhi Stadium floodlight vuah chu International match khelhna atan pawha tlak leh a nghakhleltu zinga mi a nih thu a sawi a, floodlight vuah a nih loh avanga harsatna tawktu zingah a tel tih sawiin tunah harsatna sutkian a ni ta chu a lawm thu a sawi a, floodlight chu sorkar hmasa hmalakna  chhunzawmna a nih thu a sawi a, International match khelh a nih theih nan contractor pawh theih tawpin a nawr tih a sawi. Pu Robert Romawia Royte chuan, sorkarin khelmual 13-a phullem phahna turin a ruahman tih a sawi a, a hlawhtlin theih nan MFA leh DFA te pawh theih tawp chhuahpui tura sawmin nakuma kum 17 hnuai lam hmeichhia foodball inelna Under 17 World Cup neih tur atan ram aiawha Mizo hmeichhia te a tam thei ang ber an tel theihna turin hmalak a nih thu sawiin inbuatsaihna turin SAI atangin sum pawh hmuh a ni tawh tih a sawi.

Mizoram State Sports Council Secretary Pu C.Laltlanthanga report-in a tar lan danin RG Stadium-a Flood Light siamna tur hi sorkar kum liam ta (2018-19) khan NEDP atangin Rs.800 lakh dawn a ni a, Infrustructure Development Consortium, Shillong-ten an thawk a, December ni 2, 2019 khan zawh fel a ni. RG Stadium-a flood light hi Asian Football Confederation-in a pawm chin 1200 Lux aia eng pechhuak sang zawk thei a ni a, tuna a eng pekchhuah theih zat chu 1549 Lux niin khelmual sir tuakah ban pahnih ve ve phun a ni a, ban san zawng chu 40 metre niin ban pakhat zelah light 34 vuah a ni a, Electric Current hman ngai lovin Generator 180 KVA pali hmangin tihen a ni dawn a ni. 

RG Stadium-a Flood Light hawn a nih rual hian a lawmna atan Mizoram Premier League Season kal meka semi final hmasa zawk khelh nghal a ni a, hetah hian Aizawl FC chuan an khingpui Chanmari FC chu si khat faiin an hneh a ni.