Vawiin khan Indian Council for Cultural Relations (ICCR) leh Mizoram sawrkara Art & Culture Department tangkawp buatsaihin Kazakhstan thalaite nen cultural programme Vanapa Hall-ah neih a ni a. Art and Culture Miniser Pu R.Lalzirliana chu khuallian a ni.

Pu R.Lalzirliana chuan khawvel changkang zel karah ram changkang zawkte chuan an hnam chindan leh tihdan te ngai hluin, anmahni mai bakah ram dang mi te pawhin hriatpui ve se an ti a, an hnam lam leh ziarang phochhuahna hun an buatsaih thin hi Mizote tan inzirna tur pawimawh tak a ni, a ti a. Khawvel hmasawnna chak tak kan bawhna lamah kan Mizo hnam zia te zawi te tein kan thlauthla telh telh a, kan fate pawh Mizo tawng aiin sap tawng thiam zawk mahse pawi tihlohna, chhungkaw tam tak an nei ta hial nia lang chu pawi a tih thu sawiin Art and Culture Minister chuan  kan hnam zia leh kan tawngte a ral mai loh nan vawng nung a, ngaihsan nachang leh chawisanna duhna rilru kan put thar leh a tul, a ti. Pu R.Lalzirliana chuan Kazakhstan thalaite  nen cultural programme hlawhtling taka hman a ni chu lawmthu sawiin hlawk taka hun hmang turin kalkhawmte duhsakna a hlan a ni.

Kazakhstan atang hian LN Gumilyov Eurasian National University zirlaite an lo kal a, an hnam lam an entir bakah zai leh rimawi (folk music) tum te ngaihthlak a ni. Mizoram Art & Culture Department aiawhin Lily Veng Cultural Club-ten Mizo hnam lam chi hrang hrang an entir bawk.

He cultural programme-ah hian ICCR Regional Director N.Munish Singh chuan kalkhawmte lawmna thu a sawi a, Art & Culture Director Pu R.Hmingthanzuala’n thu a sawi bawk.