Mizoram sawrkar flagship programme SEDP hnuaia din Health & Family Welfare Board chu an chairman Dr. R. Lalthangliana, H&FW Minister hovin vawiin khan Secretariat Conference Hall, MINECO ah an thukhawm.

Vawiin Health & Family Welfare Board thukhawm hian kumin October ni 1 atanga hman tan Mizoram State Health Care Scheme, 2019 kalpui a nih dan leh dinhmun te an thlir hova, Mizoram State Health Care Society Governing Board ruahmanna in AB-PMJAY leh Mizoram State Health Care Scheme, 2019 kalkawp (convergence) tir tura ruahmanna kalpui mek a nih thu sawilan a ni a, a taka kalpui a nih hunah chuan AB-PMJAY rate in damlo inenkawlna senso do phalo mahse Mizoram State Health Care Scheme notified rate in a khaichhuak thei tura beisei a ni. Mizoram State Health Care Scheme hnuaia inziahluh hun khar tawh pawh tunah hian hawn that leh a nih thu tarlan a ni a, a inziaklut thei chin zawng zawng inziaklut vek tura an duh thu an sawi a ni. Private leh Mission Hospital te zinga Mizoram State Health Care Scheme zawm theilo an la awm chungchang pawh sawiho niin tun dinhmunah damdawiin 12 - Christian Hospital, Serkawn, Christian Hospital, Lawngtlai, Lairam Christian Medical Centre, Lawngtlai, Nazareth Nursing Home, Kolasib, Alpha Hospital, Aizawl, Med-Aim Adventist Hospital, Champhai, B.N. Hospital, Aizawl, Hope Hospital, Lunglei, Faith Hospital and Research Centre, Lunglei, J.C. Eye Hospital, Aizawl, Eye Care & Research Centre, Aizawl, Nazareth Medi-Tech Diagnostic & Care Centre, Aizawl ten MSHCS an zawm tawh thu tarlan a ni. Mizoram sawrkar chuan MSHCS zawm theilo damdawi in te chu empanelled hospital an nihna atanga suspend an nih tur thu vawiin khan thupek a chhuah bawk a ni.

Vawiin Health & Family Welfare Board thutkhawm ah hian SEDP hnuaia Board hrang hrangte hnathawh dan tur leh kalphung tur sawrkarin a ruahman "Terms of Reference" inhrilhfiahna hun hman a ni bawk.

Health & Family Welfare Board Chairman Dr. R. Lalthangliana, H&FW Minister ni bawk chuan Mizoram State Health Care Scheme chu mipuite tan leh damdawi in lam tan pawh a harsatna thlenlo thei ang ber tura uluk taka ruahman a ni a ti a, AIDS vanga kan ramin harsatna a tawh hi mi zawng zawngin kan do let a tul a, hemi atana school, college leh university zirlaite, Kohhran hrang hrangte, Zirlai Pawlte leh Tlawmngai pawl hrang hrangte thlawpna an hmu tha chuan hma kan sawnpui ngei ang tih min rin tir a ni a ti a, damdawi in hrang hrang leh Health Centre hrang hrangte tihchangtlunna turin World Bank nen thawhho tum a nih thu leh inbiakna pawh awmze bei taka kalpui mek a nih thu a sawi a ni.

Health & Family Welfare Board Vice-Chairman Dr. Z.R. Thiamsanga pawhin private leh mission hospital thenkhat MSHCS la zawm ve theilo te chu a thalo lai te ennawn theih reng a nih a vangin tun dinhmunah zawm ve phawt turin a ngen a ni.

Vawiin thutkhawm ah hian Health & Family Welfare Board member te leh mithiam sawm bik te an tel a ni.