1019/2022-2023
Aizawl, the 23rd June 2022 : Deputy Chief Minister leh Public Health Engineering (PHE) Department changtu ni bawk Pu Tawnluia’n vawiin khan Multipurpose Hall Beraw Tlang ah PHE Department in kum 2022 atana an hnathawh thlirhona Works Review Meeting ni hnih chhung an neih tur chu a hawnna programme khuallian niin a hmanpui.

Deputy Chief Minister Pu Tawnluia chuan kum hnih chhung Covid hripuiin min tlakbuak hnuah leh amah ngei pawh natna khirh tak a paltlang hnuah hetianga kokima taka Department engineer te an hnathawh chungchang thlirho tura an inhmukhawm thei chu hun tha nia a ngaih thu sawiin lawmawm a ti a. Department hnathawh leh hmalakna te tun aia tha zawk leh chak zawka kalpui anih theih nan an tih dan phung pangngai bakah thil thar innovative ideas ngaihtuah chungin hmasawn duhna rilru progressive ideas pu chunga hnathawh a pawimawh tih a sawi a. Department hnathawh thlirhonaah ngaihtuahna thar thawhkhawm tura PHE engineer rual te chu chahin tangkai taka ni hnih chhung an programme hmang turin duhsakna a hlan a ni.

PHE Department enkawltu Minister ni bawk Pu Tawnluia chuan Sawrkar Laipui hnuaia Jal Jeevan Mission Scheme chu thingtlang mipui tan malsawmna anih dan te sawiin he Scheme hian thingtlang in tin chu tui in tur thianghlim pek a tum a, State Sawrkar in intina a thlawna tui connection pek chu thil harsa tak a ni a, mahse he Scheme kaltlang hian thingtlang a cheng te chu a thlawnin tui connection pek vek tur an ni a. Mizoram chu he Scheme kalpui tha zing ami a nih thu sawiin Sawrkar Laipuiin Scheme tawp tura a tih kum 2024 hma, 2023 a he hna hi Mizoram in thawh zawh kan tuma, hei hi a hlawhtlin ngei nan nasa taka kan thawhho leh tanrual a ngai a ni, a ti.

Tui bill chungchang sawiin Deputy Chief Minister chuan tui bill ennawnna hi tum hnih lai ruahman a ni tawh a mahse Covid hripuiin min tuam avangin mipui tan phurrit a nih dawn avangin hei hi kaltlangpui a nilova. Mahse tui bill tuna kan hman mek hi kum 11 chuang kan hmang tawh a, Tlawng tui pump leh sem nan Department in tui litre khat zelah pawisa 7 a sen laiin litre 5000 chin hmang te chuan pawisa 4 chiah an chawi a, Sawrkarin litre khat zelah a chawibelh chu pawisa 3 a ni a, hei hi subsidy ah a ngaih theih a, Sawrkar tan sum hlohna a ni a. Thil man sang zel ngaituahin leh Department pawh sum thawk chhuak tura Revenue target te tuk an nih thin angin tui bill ennawn hi a hun ve tawh hle a, kan tihmakmawh a ngai a, hei hi mipui lam pawhin kan hriatthiam a tul hle a ni, a ti.

Tui hna humhalh pawimawh zia leh hemi chungchang mipui in zirtir zel a tul zia sawiin Pu Tawnluia chuan pumping scheme leh tui lakna tur eng anga tha pawh nei mah ila, tui hna kan neih that loh chuan a tangkai tur angin a tangkai dawn lova, chuvangin tui hna humhalh mipui te inzirtir hi Department hnapui pakhat a nia, mipui pawh hemi kawngah nasa leh zawka kan thanharh a tul hle tiin a sawi. Sawrkar chuan tui hna humhalh chu a ngaihpawimawh avangin Tlawng Lui humhalhna tur dan a buaipui mek bakah Environment, Forest & Climate Change Department pawhin Mizorama lui lian 16 te humhalhna tur dan an buaipui mek thu a sawi.

Work Review meeting hawnna hi Er. Lalmuanzova, Secretary, PHED chuan kaihruaiin thuhma a sawi a. Vawiin leh naktukah Techical Session chhawng thum neii hun an hmang dawn a. Hengah hian Swachh Bharat Mission (Grameen); Water Supply Scheme-te Solar Pumping scheme chungchangte; Division Report te bakah tuihna/lui humhalh leh CYMA te nena thawhhona chungchang te an thlir ho dawn a ni. Meeting ah hian PHE Department a SDO/AE leh a chunglam engineer te chu an tel kim hle a ni.