2625/2022-2023

Aizawl 11th November 2022: Vawiin khan Deputy Chief Minister Pu.Tawnluia’n Pu.R.Vanlawma hriatrengna lungphun chu Maubuangah  hawnna a nei a , Pu R Vanlawma hriatrengna lungphun hi Awithangapa Thlan hmun bulah phun a ni.

Hemi programme puala vantlang inkhawm  Awithangpa Hall-a neihah, khuallian Deputy Chief Minister Pu Tawnluia chuan thu sawiin Maubuang YMA,VC leh NGO- ten lungphun hawng tura an sawm chu lawmawm a tih thu a sawi a, Pu R.Vanlawma chu Maubuang khuaa a lo piang chu an vanneih hle a ni a ti. Pu R. Vanlawma lungphun hi Maubuang khua chauhin an phun a ni lo a, Mizoram pumpuiin kan phun tlang vek a ni a ti. Pu R. Vanlawma chu Born Nationalist- Mizo hnam hmangaih tura lo piang niin a hnathawh leh Mizoram tana  a thil tih chu a chhuanawm tak zet a ni a ti. Mi pakhat ni si pawl hrang hrangin an chawimawi leh a sulhnu an hriat reng a ni a, thangthar ten a nunah zirtur tamtak an nei a ni a ti. Mizo hnam hmasawnna leh dinchhuahna kan sawi apiangin Pu R. Vanlawma hming hi a dai ngai tawh dawn lo a, hetianga hnam rohlu leh chhuanawm ni tura a nu leh pa ten theihtawp chhuaha lehkhha an zirtir chu lawmawm a tih thu a sawi a, zahna chibai a buk nghal bawk a ni.

Pu Tawnluia chuan, Pu R .Vanlawma leh Hmarlutvunga (Awithangpa),Mizo hnam rohlu te lo chhuahna khua Maubuang khawtlangin hetianga anmahni hriatrengna lung an phun chu lawmawm a tih thu sawiin , khawtlang tangrual leh inngeih tak an nihzia a tarlang a, hun lo kal zel turah khawtlang tha leh nuam tak ni zel turin duhsakna a hlan nghal a ni.

Khualzahawm  Prof.F.Lalnunmawia pawhin thu sawiin Pu R. Vanlawma chu Zofate zinga pa ropui tak, ram leh hnam tana theitawp chhuah thin a  ni a, a nunah hian thangthar ten zirtur tam tak kan nei a ni a ti. Maubuang khua chuan Mizorama khaw faiber nihna la thei hiala an khawtlang tangrualna leh an thawhhona chu chhuanawm a tih thu a sawi bawk a ni.

Hall-a programme hman hi Pu.Ramfangzauva (Chairman, Organising Committee) chuan a kaihruai a lungphun bulah programme tawite chu Pu C.Laldingngheta (VCP) in kaihruaiin Pu.Lalchhanhima chuan lungphuna thuziak chhiarchhuahna hun a hmang nghal a ni.

He lungphun hawnna inkhawm hi Mizo Academy of Letters(MAL) Aizawl, Lunglei ,Mizo Writters Association, MZP leh Lelte  hruaitute’n an hmanpui a, inkhawm zawhah hian khawtlanga chawhlui kil hona neih  nghal a ni.

Pu R. Vanlawma hian thu leh hla lamah nasa takin Mizo hnam tan sulhnu a lo nei tawh a, lehkhabu paruk lai ziakin, ‘Ka ram leh Kei’ Vol-1&2, Awithangpa chanchin te chu a lar zual te an ni a, kum 1998 khan Padma Shri Award in Literature & Journalism ah a lo dawng tawh a ni.