2626/2022-2023

Aizawl the 11th November 2022 : Health and Family Welfare Minister Dr.R.Lalthangliana chuan zanin khan Central Young Mizo Association (CYMA) leh Mizoram State AIDS Control Society (MSACS) te bultuma HIV/AIDS hluar zel tur dona kawnga hmalakna, 'Zoram Harh Rawh Campaign' kaltlanga Branch YMA te tana Mizo hnam lam leh zai hmanga intihsiakna neih tur chu Central YMA Hall Tuikhuahtlangah a hawng.

Khuallian Dr.R.Lalthangliana chuan Central YMA ten pa chan changa Mizoram harsatna lian ber HIV/AIDS do hneh a nih theihna tura MSACS-te nen thawhhona thuthlung an ziak chu lawmawm a tih thu a sawi a. Mizoram chu ram ralmuang, ziak leh chhiar thiam tamna, sakhaw khat vuan tamna, rampawn mite tan pawha tlawh chakawm a nih laiin heng kan chhuanawmna phenah hian HIV/AIDS leh Cancer vei tamna kan ni erawh a pawi tak zet a ni, a ti. Health Minister chuan heng natna hluar mek do hneh hi mut mawh hnar mawha neih theuh a, tanrualna nena beihpui thlak turin mitin te a sawm a. HIV/AIDS chu damchhung titawi thei natna,retheihna leh ram hmasawnna tithuanawptu, thalaite hnathawk thei loa siamtu leh hnam timang thei natna a ni a, hmangaihna leh lainatna nena kan do let a ngai a ni, a ti. YMA, Kohhran, Khawtlang leh sawrkar tanrualna chuan chhinchhiahtlak takin Covid dona kawngah rah tha a chhuah tawh a, chutiang bawkin HIV/AIDS do tura thawhhona pawhin rah duhawm tak a chhuah ngei a beisei thu sawiin Dr R Lalthangliana chuan ‘Zoram Harh Rawh Campaign’ hi a hawng a ni.

He hunah hian MSACS Project Director Dr.Lalthlengliani chuan report a pe a, intihsiakna ngawr ngawr aiin thalaite ko khawm a HIV/AIDS do tura tih tur leh tih loh tur inzirtirna hun hman chu an duh ber a nih thu a sawi.

Central YMA President Pu R.Lalngheta leh General Secretary Prof.Lalnuntluanga te pawhin thusawiin kan ram leh hnam a ral loh nan HIV/AIDS do tura kan tan tlan theuh a pawimawh thu an sawi a ni.

Zoram Harh Rawh Campaign-ah hian HIV/AIDS darh zel tur ven nan mipuite inzirtirna ni pahfawmin District hrang hrang pakua a YMA Branch te tan hnam lam leh zaia intihsiakna neih a ni dawn a. Mizo hnam lam intihsiakna atan Cheraw (Kantluang) leh Khuallam te thlan a ni a, hla hmanga intihsiakna atan Darmani zai chu hla intawm atana thlan a ni a. Heng bakah hian Lianrikhumi zai, Awithangpa Tlawh zai, Labour V Force zai leh Domangi zai te zinga an duh ber pakhat thlanga intihsiak tur a ni dawn bawk. District tina titha zual te hian December ni 1, 2022 World AIDS Day hian Aizawl ah rampum huap inelna an hmachhawn leh dawn a ni.