2627/2022-2023

Kolasib dated 12th November 2022: Vawiin chawhma khan NKGSA Basketball Court, Hmar veng, Kolasibah Kolasib District Basketball Association buatsaih, 3rd RT Inter Veng Basketball Tournament hawnna hun hman a ni a. Pu K.Lalrinliana, Minister, FCS & CA, Kolasib Assembly Constituency bialtu MLA chuan khuallian niin Tournament a hawng a ni.

Minister Pu K.Lalrinliana chuan Mizote chu infiamna kawng hrang hrangah hmasawnna hmel thar kan hmuh mek thu sawiin Basketball-ah pawh India ram pum ang pawh a dinhmun tha pawl tak kan luah thu a sawi a. Mizo thalai engemaw zahin infiamna chu eizawnna tling ah an hman tawh thu Minister chuan tarlangin mahni inthunun nan leh taksa hrisel nan infiamna chu intihhmuh zel turin kalkhawmte a fuih. Kolasib khaw chhung ah infiamna tih hmasawn nan hmalak thin a nih thu sawiin College vengah indoor Volleyball Court sakna turin ruahmanna a kal mek thu Pu K.Lalrinliana chuan a sawi.

3rd RT Inter Veng Basketball Tournament ah hian team 15 an inziaklut a, Kolasib khaw chhung veng bak ah Vairengte, Kawnpui, Lungdai leh Bilkhawthlir atangin an rawn tel bawk a ni. Tournament hawnna hun hi Pu Samuel Lalrinawma, Vice President, KDBA in kaihhruaiin Pu Gary Lalrinawma, Asst. Secretary in report a pe.