Tukin zing khan Deputy Chief Minister Pu Tawnluia chuan Zodin Multilevel Car Parking cum Utility Centre, Aizawl chu a hmunah kalin a endik a, Pu C Lalmuanpuia, MLA leh Pu Zothantluanga, MLA ten tawiawmin a hna thawktute a kawm a, hma lak chhunzawn dan tur te a sawipui.

Deputy Chief Minister Pu Tawnluia chuan,” Aizawl khawpui chhungah parking indaih lohna avangin kan kawngpui leh khawpui te hi a tawt hle a, kawng dunga motor dah vangte hian motor chet vel a harsa in traffic jam vangin harsatna a nasa thin hle a ni,” a ti a,” Heng harsatna te tih ziaawm nan leh sutkian anih theih nan Mizoram sawrkar chuan motor park-na hmun tur hmun remchang lai laiah siam ni se tia ruahmanna a siam a, Zodin Cinema Hall awmna ram chu Sawrkarin leiin Multi Level Car Parking tha tak siam tura hmalak a lo ni ta ni,” a ti. Pu Tawnluia chuan,” Mipui tana tangkai tur zawk a sawrkarin a ngaih avangin Car parking chauh siam lo hian a building ah hian Utility Centre dah tel bawk ni se tiin ruahmanna siam a ni,” a ti a,” A hmingah pawh Zodin Multi Level Car Parking cum Utility Centre tih a lo ni ta a, a sakna tur atan hian cheng nuai 2500 ruahman a ni,” a ti bawk.       

Zodin Multilevel Car Parking cum Utility Centre sakna tur hian October ni 12, 2017 khan sanction hmuh a ni a, UD&PA Department chuan design competition te buatsaihin, ngun taka endik a nih hnuah JMT Architect te design thlan a ni a, fully Automated Car Parking System with Utility Centre, Mizorama hmasa ber turin hma an la zui a ni. Heng bakah hian heng specialized work firefighting system, Automatic Fire Alarm system, Internal Electrification, 13 Passengers lift, Structural Glazing, Glass & Stainless steel works te pawh awm tura ruahman a ni.

He project sakna tur hian cheng nuai 2500 ruahman a ni a, motor 100 hun theih a sak tur a ni. A building hi Ground floor bakah chhawng riat (8) a sang tur niin Food Court, Exihibion leh Multi-purpose Hall te a awm dawn bawk a ni.