Social Welfare Department hnuaia One Stop Centre Kolasib Vengthara sak thar chu vawiin khan Kolasib Bawrhsap Pu Zoengsanga’n a hawng.

One Stop Centre hi kawng hrang hranga harsatna tawk hmeichhiate tluk luhna tura ruahman ani a, hmeichhia pasal te kut tuar, in atanga hnawchhuah emaw himna emaw tanpuina zawng ten an pan thei dawna mi pakhat tan ni nga aia reilo awm theih na tura hmun ruahman a ni.

Hawnna inkhawm hun buatsaih ah Bawrhsap chuan thu sawiin Za a Za Kristiana inchhal na ramah One Stop Centre mamawhna a sang ta em em mai chuan a ngaituahna a ti kal thui hle ani a ti a, kum 100 chuang chanchintha ina min chenchilh hnua kan ram dinhmun hi a lungawithlak em tih inzawh nawn fo angai ani a ti. Khawvel hmasawnna zelah thil thalo zawngin kan tuihal a, suahsualna chi hrang hrangin mizo society ah bu a khuar nasa em em mai a chu chuan natna leh harsatna chi hrang hrang a hring chhuak a, kan khawtlang nun hi kan Pathian thu buaipui dan nen hian a inpha manlo (balance lo) ani ati.

Bawrhsap chuan Sunday Christian chauh ni lovin kan hnathawhna hmun leh kan nitin nunah Pathian thu hi a taka kan nunpui a ngai ani tiin chhungkaw tin atanga bul tan angai ani ati. One Stop Centre rawn pan tute chu Rilru hliam sa an ni dawna thawktu te chuan tawngkam hawihawm leh ngaihthlak nuam hmang se, hmeichhe tanpuina mamawhtu ten thawktu te ah thlamuanna an neih theihnan Kristian mize diktak lanchhuah tir turin One Stop Centre a thawkte chu a chah ani.  

Kolasib vengthara One Stop Centre hi Ministry of Women and Child Development bultuma cheng nuai 38 senga Pi Lalbiakengi’n a sak ani a, khum panga bakah Counseling Room, Office leh choka awmin thawktu Centre Administrator, Counselor, Case Master, Paramedical Staff etc an vaiin pakua an awm a ni. Kawng hrang hranga harsatna tawk hmeichhia ten an pan thei dawn a, women Helpline 181 kaltlangin dawr/rawn theih an ni bawk.