Centre for Professional Development of Teacher Educators, School of Education, NEHU leh Institute of Advanced Studies in Education (IASE) tangkawpin ‘Faculty Development Programme on Assessing the Education Policy Environment: Implications for Pre-Service and In-Service Teachers’ an buatsaih a. Ni hnih hawh tur faculty development programme hi vawiin chawhma khan Aizawl DC Pu Vanlalngaihsaka’n hawnna hun a hmanpui a ni.
Pu Vanlalngaihsaka chuan nakin lawka ram hruaitu la ni tur zirlaite zirtirtu an nih angin zirtirtute chu ram leh hnam dinchhuahna atana hna pawimawh tawp khawk thawktu an ni, a ti a. Mi puitling, rintlak, chhawr tlak, ram tana mi hmantlak chherchhuak turin zirna a pawimawh ber a, heti taka zirna a pawimawh avang hian zirna tha nei turin ramin zirna kalphung Education Policy tha a duan chu a pawimawh tak meuh a ni, a ti. Zirtirtu ni mek leh la ni turte tana Education Policy zirchianna lam hawi programme pawimawh buatsaih a ni chu lawmawm a tih thu sawiin Aizawl DC chuan Mizoram leh Mizo mipuite tana thil tangkai an zirchhuah ngei a beisei thu a sawi.
Hawnna programme hi Prof.Vanlalhruaii, Principal IASE in kaihruai a. Dr Jemino Mawthoh, Associate Professor, Department of Adult and Continuing Education, NEHU chuan report leh programme hman dan tur a sawi a. Prof. M.U. Alam, Head, Department of Lifelong Learning & Extension, University of North Bengal chuan thupui sawizauna hun a hmang a; Dr Donna Lalnunfeli, Assistant Professor, IASE chuan IASE hlawhtlinna leh hmathlir a sawi thung.
He programme a tel tur hian District tin DIET atang te, MZU, SCERT, MBSE, MHTC, IASE leh School Education Department, Mizoram atangin Lecturer leh Officer rualte an kalkhawm a ni. Resource person turin Mizoram pawn atangin University of North Bengal leh NEHU professor te bakah Mizoram chhung atangin Mizoram University leh IASE professor te an tel.
