Vawiin chawhma khan Conference Hall, Directorate of Economics & Statistics, Aizawl ah ‘Two Days Seminar On Early Identification & Intervention Of Childhood Disabilities In North Eastern States’ hawnna hun hman a ni a, Social Welfare department minister Dr K Beichhua chu khuallian  a ni.

Dr K Beichhua, Minister, Social Welfare Department chuan kum naupang lama hma taka rualbanlohna hmuhchhuah leh enkawl kawnga inzirtirna tha tak Social Welfare department, Health & Family welfare department leh National Institute for Locomotor Disabilities (NILD) te tangkawp in an buatsaih thei chu lawmawm a tih thu sawiin,” Kan ram chhunga rualbanlo enkawlna kawngah hma kan sawn phah ngei ka beisei a, hmun hrang hrang atanga ruabanlo enkawlna kawnga mithiamte leh tawn hriat ngah tak tak te zirtirna kan nei tur hi tangkai taka hman theuh i tum ang u,” a ti. Minister Dr K Beichhua chuan Social Welfare department ten rualbanlote chhawmdawlna leh dawmkanna tura hmalakna hrang hrangte a tar langa, mi 76 te hnenah kum 2018-19 chhung khan puanthuina khawl leh sumfai a puihna an pek thu a sawi. Lehkhathiam rualbanlo, employment exchange a inziaklut, kum hnih chhunga eizawnna mumal la hmulo 25 thlanchhuahte hnenah thlatina puihna cheng 650 pek a nih thu te, rualbanlo zirlaite hnena zirlaibu leh school uniform lei nana puih thin an nih thu leh zirlai 768 hnena puihna pek mek anih thu te leh Disability Pension (State Scheme) hmang mi 200 an awm mek thu a sawi bawk. Dr K Beichhua chuan ,”Rualbanlote tan Identity Card hran, Unique Disability Identity Card (UDID), sawrkar tana rualkhai zawk leh felfai zawka scheme hrang hrangte kalpuina tur leh inziahluh leh chhinchhiahna fel tak a awm theih nan kalpui a ni,” a ti a,” District Hospital a dil theih niin, Disability certificate, Proof of residence leh passport size photograph thehluh tur a ni a, September ni 20, 2019 thleng khan Mizoramah mi 1583 hnenah UDID pekchhuah tawh a ni,” a ti bawk. Minister chuan Accessible India campaign hnuaiah Sawrkar building 27 te chu rualbanlote tan luhchhuah awmsam zawka siam rem a nih thu leh Sawrkar department hnuaia website enkawl 203 te chu rualbanlote tana awlsam zawk a hman theih tura siam anih thu a sawi bawk. Dr K Beichhua chuan Tribal Art Centre, Tanhril a bunna turin National Institute for Empowerment of Person with Visual Disabilities, Govt. of India atangin cheng nuai 88.11 hmuh a nih thu a sawia,” He khawl hi bun fel anih hunah chuan mitdel hawrawpin lehkhabu pawimawh hrang hrang kan chhu thei tawh dawn a ni,” a ti.

Vawiin seminar hawnna hi Dr Robert L Khawlhring in a kaihruaia Dr SP Das, Director, NILD, Dr Lalnunthara, Commissioner, PwDs leh Pi Vanlalzawni, Director, SWTA ten thu an sawi a, Zoram Medical College, Health & Medical Education, Civil Hospital (Aizawl), RIPANS, SCERT, NILD-RC Aizawl, NPPCD, Samaritan Association for the blind, Blind Society, Gilead Special school, Shining star school te atangin he seminar chhim tur hian an lo kal a ni.