Vawiin khan Pu R. L. Pianmawia, Deputy Chief Whip leh Tuivawl bialtu MLA ni bawk chuan tunhnaia Kepran leh East Phaileng-a lei min na hmun te a tlawh a. Pu R. L. Pianmawia hi Pu Lalchhanliana, EE, National Highway Division II PWD leh a thawhpui SDO leh JE te; Pu F. Lalnuntluanga, Geologist, Geology & Mining Department leh Pu K. Lalrohlua, BDO, Thingsul RD Block ten an tawiawm.

Pu RL Pianmawia hian amah tawiawmtu te leh khawtlang hruaitute nen leimin na hmun te an enfiah a, leivung paih dan tur ruahmanna an siam a, a bul hnai te a min belh loh nan hmun engemawzat ah tuiluankawr siam dan tur te pawh an sawiho. Pu F. Lalnuntluanga, Geologist pawhin uluk takin a enfiah in, heng leimin na hmuna lei te hi a thawl avangin ruahsur in lei chu ti ritin lei a ti min ta nia a rinthu a sawi.

Kepran ah hian May ni 10 khan Pi Rothangpuii in chhak ko sang tak chu a min a, hei hian National Highway-150 chu a hnawh a. Pi Rothangpuii in (assam type) hi luah ngam anih tak loh avangin khawtlang hnatlang in an thiat a ni. Leivung te chu a theih chin chu JCB in an thianfai tawh a, JCB-in a hai theih bak leivung la awm chu khawtlang in an thianfai dawn a, a paihna tur motor chu PWD lamin an ngaituah dawn a ni. Helai leimin khuh nan hian Pu R.L Pianmawia chuan Silpualine 7 a pe a, khawtlang hnatlang te thingpui in na tur tanpuina sumfai khawtlang hruaitute a hlan bawk.

East Phaileng ah hian May ni 17 zinglam khan Pu Lalhmingliana kawmthlang chu thui tak a min a, a thlanga an vengchhung inkalpawhna kawng EGS Road chu hnawh in, kawng an a Assam type in pathum: Pu Lalzuithanga, Pu C. Lalsiama leh Pu C. Lalhmingliana te chen na In tan leimin hi a hlauhthawnawm avangin heng chhungkaw 3 te hi an riak ngam lo a ni. Khawtlang hnatlang in leivung hi engemaw chen an lo thianfai tawh a, a bak pawh hnatlanga thenfai an tum thu VC ten an sawi. Helai leimin khuh nan hian Pu R.L Pianmawia chuan Silpualine 8 a pe a, hnatlang te thingpui in na turin tanpuina sumfai khawtlang hruaitute a hlan. East Phaileng khawchhung hmun hnih-a kawng chhuat tlem a tlak hniamna hmun te pawh an en bawk a, helai hmunah te hian tuiluan kawr siam dan tur khawtlang hruaitu te nen an sawiho a ni.

East Phaileng ah hian September 2007 khan hmun thenkhatah lei a lo tlahniam tawh a ni.