3139/2023-2024

Khawzawl, 20th December 2023: Deputy Chief Whip, Pu W. Chhuanawma, 22-Tuichang (ST) AC bialtu ni bawk chuan nizan khan zan hnih riak turin Khawzawl a thleng a. Tukin khan Dy. Chief Whip hian ‘Chhanchhuahna Home, Zuchhip’ tlawhin Krimas lo thleng tur pualin tanpuina ₹12,000 a hlan a; chawhma lamah MLA a thlan tlin anih lawmna puala ‘Faina Hnatlangpui’ buatsaih a telpui a, chawhnu dar 02:00 khan Khawzawl District-a sawrkar Department hotute nen inkawmna hun an nei.

Head of Office te nena meeting Khawzawl DC Meeting Hall-a neihah thu sawiin Pu W. Chhuanawma chuan sawrkar hnathawkte nen inkawmhona hun tha tak an neih avangin lawmthu a sawi a. An thutiam ‘Kalphung Thar - Mipui sawrkar’ enchhin duh avanga an chunga    mipui ten rinna an nghat ngam chu lawmawm a tih thu sawi bawkin, an thutiam chu anmahni teh nan a hmang leh turin kalkhawmte a chah a ni.

Tuichang bialtu MLA chuan ram rawngbawlna huangah suangtuahna lian tak pahnih - ‘Agriculture & Allied Sector-a eizawng Mizoram mipui zaa 60 (60%) chuang ten an thawhrim rah hmu thei se’ tih leh ‘Eirukna leh hlemhletna umbo’ tih thupui nei chunga a luh thu a sawi a. Mizoram sawrkar thar chuan eirukna um bo chu hna hmasaah neih a tum a, Chief Minister Pu Lalduhoma pawhin Central Bureau of Investigation (CBI) te General Consent an pek tur thu a sawi te tarlangin; amah ngei pawh Mizoram leh Tuichang bial mipuite hmaah eiru lo tura a intiam thu a sawi bawk.

Pu W. Chhuanawma chuan sawrkar thiltum leh ngaihpawimawh (policy matters) piahlam, nitin inrelbawlna (day-to-day administration) ah sawrkar hnathawkte dan chep an tum loh thu sawiin, sawrkar office ten sawrkar atanga hamthatna dawng tlaka an ngaih chu rintlakah an ngai dawn a ni, a ti a. Chief Minister duh dan angin sawrkar hnathawk te chu zalenna zau tak pek a duh thu leh Ruling Party hruaitute hlauhna sawrkar hnathawk ten nei lo se a duh thu a sawi a. Mizoram sawrkar thar chu tawnhriat la nei lo an nih angin kalkhawmte chu anmahni finchhuaha, thawhpui leh tanpui turin a ngen nghal bawk.

Meeting hi Khawzawl DC Pu K. Lalrohlua chuan kaihruaiin,  Khawzawl District chhunga sawrkar department hotuten an hnathawh, hmachhawp leh tanpui an ngaihna te an sawi a. Meeting zawh hian Dy. Chief Whip hian Grace Camping Center, Khawzawl tlawhin, tanpuina pawisa fai ₹10,000 a hlan  a, naktuk zing hian Khawzawl District Hospital a tlawh ang a, he mi hnu hian Khawzawl chhuah sanin Aizawl a pan ang.