3138/2023-2024

2023 Pawltlak thla ni 20: Vawiin khan Kolasib DC Conference Hall-ah District Bawrhsap Pu John LT Sanga hovin Krismas leh Kumthar vuakveta Kolasib District chhunga dan leh thupek kenkawh dan tur leh halpuah, halmawi leh ruihtheihthil khuahkhirh dan tur chungchangah ṭhut khawm buatsaih a ni.

Pu John LT Sanga chuan Krismas leh Kumthar vuakvet chu mipui vantlang kan zalen lai leh rilru zangkhai lai a nih thu sawiin, dan leh thupek kengkawhtu magistrate, police leh excise leh tlawmngaia duty te tan ṭan lak lehzual a ngaih hun lai a ni, a ti a. He hunpui chhung hian dan leh thupek kengkawhtute'n an mawhphurhna zawnah ṭheuh ṭan la tlang tur leh eng emaw thil thleng palhah pawh hma la nghal thei tura inring reng turin a chah a ni.

Kolasib District Senior Superintendent of Police Pu Lalrinawma Traite chuan hunpui lo thleng tura security arrangement chungchanga ruahmanna an siam dan sawiin, veng hrang hrangah YMA te nena duty dan tur ruahmanna siam a nih thu a sawi a. Venhimna hna thawh bakah, ruihhlo do kawngah pawh theih tawp chhuaha hma lak a nih tur thu a sawi.

Pu Joseph C. Lalhmangaihzuala, Office-in-charge, Excise & Narcotics Department, Kolasib chuan excise duty dan tur ruahmanna tlangpui a tar lang a. A ṭulna apianga duty-a che chhuak turin ruahmanna an siam tawh thu a sawi.

Kolasib Sub-Headquarters YMA Secretary Pu Lalnunmawia chuan thlamuang tak leh hlim taka mipuite'n hunpui an hman theihna turin veng tinah YMA duty post siama duty tura ruahmanna siam a nih tawh thu a sawi a. December ni 24 aṭanga December ni 31 zan thlenga duty dan tur leh magistrate-te nena khawpui dung suartluan dan tur te tar langin, Seṭhawn aṭanga Gosen veng thlenga duty tura ruahmanna siam a nih thu a sawi bawk.

He hunah hian hunpui chhunga Kolasib District mipuiin harsatna an tawh lohna tura ruahmanna hrang hrangte sawi ho a ni bawk.