1789/2023-2024

Khawzawl, 7th September 2023: Vawiin khan Tuichang AC bialtu Deputy Chief Minister Pu Tawnluia chuan Govt. Khawzawl College Academic Building thar leh Warden/ Staff Quarter chu a hawng.

Building thar hawnna puala inkhawm tawi Govt. Khawzawl College Multipurpose Hall-a neihah thu sawiin Deputy Chief Minister chuan Govt. Khawzawl College-a hmasawnna hna thawh hawn tur a awm chu lawmawm ti hle in , a changtu Minister Dr. R. Lalthangliana leh a chhawrtu tur Khawzawl khawtlang leh zirlaite chu a lawmpui thu a sawi. Govt. Khawzawl College chu khawtlang hruaitu hmasa ten hmathlir thui tak neiin harsatna karah an lo din a, vawiina dinhmun duhawm zawk a lo thleng thei chu a lawmawm hle a ni, a ti.

Deputy CM chuan Khawzawlin khawvel thang mek zelah ke thui takin a pen ve zel a ni tih hriat chu nuam a tih thu a sawi a. College Activities hrang hrangte chu zirlaite nun siamtu ni se a duh tih sawiin, zirlaite chu hmathlir thui tak neia mahni intunnunna atan bakah ram leh hnam tana an thiamnate hmanchhuah tum turin a chah a ni. Mizo hnam rilru ( Mizo nationalism spirit) chu thalaite rilru ah thi lo se, mahni hnam nun chawisan leh chawinun chu midangte pawhin min ngaihsan zawkna a ni, a ti a. Zirlaite chu tawng hrang hrang thiam tum tur leh an pianpui tawng erawh ngaihthah hauh loh turin Deputy CM hian a fuih a ni.

Deputy CM hian Govt. Khawzawl College-in a hnena a mamawh an thlen te chu MLA Fund atanga ngaihtuahsak a tum thu a sawi a, Govt. Khawzawl College NCC mamawh a hman turin ?50,000 a pe nghal bawk. NHIDCL Social Development Fund kaltlanga Futsal Ground siam an dilnaah pawh theihtawp chhuahpui a tum thu Deputy CM hian a sawi a ni.

He hunah hian Additional State Project Director (RUSA) Dr. Zarzoliana chuan techical report a pe a. Vawiina hawn tak Academic Building leh Warden/Staff Quarter hi Rashtriya Uchchatar Shiksha Abhiyan (RUSA) 2.0 hnuaia Component 9-na : ‘Infrastructure Grants to Colleges’ hmanga sak a ni a. Academic Building hi cheng vaibelchhe 1 senga sak niin; LB Associates, Architecture & Consultation Consultant ten plan an siam hnuah, Sky Ridge Construction & Consultancy Services ten a sak hna an thawk a. September ni 17,2019 khan sak tan nin January 19,2021 khan sak zawh a ni. Building hi Mizopa chhiara chhawng hniha sang, square feet 2340 a zau a ni a. Ground floor-ah garage awmin, first floor-ah classroom pathum bakah mipa leh hmeichhe inthiarnate a awm a . Building design hi lirnghing natna rama awm ( Seismic zone V) a ni tih hre chunga - Indian Standard (IS): 456-2000, 2502-1963, 4326-1993, 2502-1963 zulzuia duan a ni a, sak zawm (vertical extension) pawh dawl tura ngaih a ni. Warden/staff quarter hi cheng nuai 31 senga sak a ni a. February ni 2, 2021 atanga sak tan niin, September 2023 ah sak zawh a lo ni ta a ni. Building hi square feet 864 a zau a ni a, room pali - Living room, kitchen leh bedroom pahnih a awm a. Toilet cum bathroom pahnih leh bathroom pakhat a awm bawk a ni.

Vawiin inkhawm hi Govt. Khawzawl College RUSA Co-ordinator Pu R. Lalthanliana chuan a kaihruai a, Pi Lalrinchami, Associate Professor pawhin thu sawina hun hmangin Pi Lalthlamuani, Associate Professor in lawmthu sawina hmangin inkhawm hi tihtawp a ni.

Govt. Khawzawl College-a hun a hman zawh hian Deputy Chief Minister Pu Tawnluia hian Khawzawl Deputy Commissioner Office sak mek leh a tualzawla ‘Khawzawl District Lungphun’ siam mek chu a enfiah nghal a ni.