1788/2023-2024

Aizawl 7th September, 2023: Vawiin khan Pu Lalruatkima, Rural Development Minister chuan Reiek Block Development Officer Pisa, Cheng Nuai 161.64 senga sak thar chu khuallian niin a hawng. Pu Lalrintluanga Sailo, Dy. Govt. Chief Whip, bialtu MLA ni bawk chu khualzahawm a ni.

Khuallian Pu Lalruatkima chuan hripui na tak karah RD department thawktute leh khawtlang hruaitute thawhhona zarah BDO office building thar pali leh Project Director Office pathum hawn theih a ni chu lawmawm a tih thu a sawi a, Dampa bial mipuite mamawh ber ni-a a hriat chu an bialtu MLA ni mek chu a ni tiin Pu Lalrintluanga Sailo-in a bial mipuite a ngaihsakna chu fakin a bial hmasawnna a lawmpui thu a sawi. Reiek chu khualzin mite tana destination tha tak a nih angin khawtlang mipuite inbuatsaihna pawh a tha hle a, self help group hmangin kawng hrang hrangin eizawnna lamah hmasawnna a awm theih ngei a beisei thu sawiin kan economy than chhoh zelna tura kan ngaihtuahna hmang zel turin kalkawmte a chah a ni. Mizoram RD department chuan Mizoram mipui 80% vel an kan enkawl mek a, kan sorkar term chhung hian ni 100 thawh tura tih a nih angin kan la thawk thei zel a ni a ti. Chumi hlawhtlinna chu sorkar leh officials bakah khawtlang mipuite thawhhona tha tak a awm vang a ni a ti bawk. Ni 100 inhlawhna-ah kan state chuan kan thawh that avangin Central atangin duhsak bik kan ni bawk a ti. Kan thalaite dinchhuahna turin self help group kaltlangin MzSRLM hmalakna-in kalpui mek a ni tiin thalai mi tumruh, taima leh teirei peih te'n hlawhtlinna an chang mek zel chu lawmawm a ti hle a. Mizote chu kutthemthiam tak kan ni tih hi hre reng ila, chu kan themthiamna chuan eizawnna remchang min siamsak zel a ni a ti bawk. Mipuite inpekna leh thawhhona zarah a department enkawlah hlawhtlinna an chang thei chu lawmawm a tih thu a sawi bawk. Pathianin zofate min hmangaih a, kan tanrualna rah kan seng mek zel a ni tiin vawiina hawn tak building thar chu khawtlangin tha taka an vil avangin thataka zawhfel theih a ni a vil chhunzawm turin a chah bawk. BDO leh a staff te chu VC te thurawn lakna leh ngampataka an Len theihna turin in hawng taka awm tura chahin duhsakna a hlan nghal a ni.

Khualzahawm Pu. Lalrintluanga Sailo, Dy. Govt. Chief Whip chuan a bial chhunga hetiang building tha tak mai sak a ni chu lawmawm tiin RD Department hnuaia thawktute inpekna-ah lawmawm tiin lawmthu a sawi a ni. A bial chhunga West Phaileng RD block pawh block upa tawh tak a ni tih sawiin a chhawmdawlna tur ngaihtuahsak leh turin RD Department hotute a ngen nghal bawk a ni. Sawiselna karah pawh khawtlang hruaitute inlungrualna a pawimawh tiin thawhhona tha neih chhunzawm zel turin a chah a, a bial chhunga RD minister hmalakna chu lawmawm a tiin a enkawl department kalzelna turah duhsakna a hlan nghal.

Pu. Lalrintluanga Sailo chuan Green Homestay & Restaurant MzSRLM leh Reiek Block Mission Management Unit tangkawp buatsaih khualzin mite tan a hawnna hun a hmang nghal.

Pi R.Lalrinzuali, BDO, Reiek chuan technical report a pe a. BDO office building hi MGNREGS (Mahatma Gandhi National Rural Employment Guarantee Scheme) fund contractor profit paih hnuah nuai 161.64/- hmanga sak a nih thu a sawi. BDO office hawn thar hi Mizopa chhiar a chhawng li niin basement floor zau zawng hi 105 sq.m a ni a, ground floor leh first floor zau zawng hi 175 sq.m ni ve ve in, second floor hi 203 sq.m a ni. Building structural design hi IS Code for Seismic Zone V Specification anga siam niin Officer Room -4, Staff Cell -6 bakah mi 108 lenna Conference cum Training centre a awm a ni. Reiek RD Block hi 1974 a din niin hetiang building thar tha tak sak a nih theih nana sulsutu Reiek BDO lo ni tawh zawng zawng leh Sorkar chungah lawmthu a sawi a ni. Building hi nikum May 20 khan sak tan niin kumin August 18 khan sak zawh a ni a, thla 16 chhunga sak zawh a ni thu a sawi.

Vawiin programme-ah vek hian Block Mission Management Unit (BMMU), Reiek, MzSRLM hnuaia hmalakna te short video clip entirna hun Reiek BDO/ Block Management Director-in a nei nghal bawk a ni.

Building thar hawnna programme hi vawiina office building thar hawn tak Conference hall-ah hman a ni a. Pu R. Lalthazuala, Director RD Department-in kaihruaiin inlawmna thu a sawi a, Pi Ethel Rothangpuii, Jt. Secretary, RD Department, Govt. of Mizoram-in lawmthu sawina hun a hmang bawk a ni.

Hawnna inkhawm-ah hian CEO, MzSRLM, Dy. Secretary, RD, bakah Reiek RD block hnuaia khawtlang hruaitute, NGO leh sawmbikte an tel a, tlai lamah ruai kilho nghal a ni.