1787/2023-2024

Dated Siaha 7th September 2023: Vawiin khan District AIDS Prevention and Control Committee (DAPCC) buatsaihin District Level Red Ribbon School Quiz Competition chu Don Bosco School Hall, Siahaah neih a ni a, Pu Lalhmunsanga Hnamte, DAPCC Chairman leh Disrtrict Bawrhsap ni bawk chuan khuallian niin hun a hmanpui.

Pu Lalhmunsanga Hnamte chuan Mizoram chu HIV/AIDS hluarna ber state a ni mek tih sawiin tan lak nasat a ngai hle a, HIV/AIDS dona kawngah mitinin mawhphurhna lian tak an nei a ni, a ti. Tun hmaa drug addict-te chauhin an vei tura ngaih thin kha tunah chuan natna tlanglawn ber a lo nita hial a, heihi mitin inthlahdah leh nun dawngdah vang a ni tiin mahni theuh in enfiah nawn a ngai a ti. HIV/AIDS kai theihna kawng hrang hrang zingah mipat hmechhiatna hman atang a kaina a tam hle tih tarlangin hemi kawngah hian fimkhur a ngai a, zirlaite chu nupui pasal neih hmaa sex hmanglo turin a chah a ni.

Khuallian chuan tun hnaiah HIV/AIDS hlauhna a tlahniam hle ni a ahriat thu sawiin chu chuan he natna hlauhawm tak hi a tipung chak hle a ni, a ti a. Natna tihbaiawm tak leh tihdam theihloh a nih avangin he natna kailo tura inven chu a pawimawh hle a, a bik takin zirlaite chu an nun uluk tur leh ruihhlo laka fihlim turin a chah a. Vawi khat tih chhinna hian ruihhlo bawiah mi a hruailut fo thin a, ruihhlo laka filhim turin tih chhin loh a pawimawh hle a ti. Tunlai thiamna sang zelah sualna pawh nasa takin a pung tih sawiin Pu Lalhmunsanga Hnamte chuan ruihhlo hluar zel tur ven nan mahni theuh kan pawimawh tiin zirlaite chu thil tha leh tha lo thliar thiam a, a tha zawng leh chhungkua leh khawtlang tana mi tangkai ni zel tura inbuatsaih turin a chah a. A bik takin mobile phone hmansualna avangin mi tam takin nunkawng diklo zawhin, zu leh ruihhlo lama tlan phah nan an hmang nasa tih tarlangin zirlaite chu an zirlai tana tangkai bakah chuan mobile phone hmang lo turin a chah bawk.

Khuallian chuan HIV/AIDS natna vei mekte endawng loh a tul hle a ti a. Nun hmansual vang ni lo a tipalh thil tak meuh meuh a kai pawh tamtak an awm tih sawiin, an mahni tanpuitu nih chu thil hlu tak a ni, a ti. Tun laiah chuan damdawi tha tam tak a awm tawh a, ARV( Antiretroviral drug) chu hman nasat a nih thu sawiin, HIV hrik te that in tirem vek lo mahse an in thlahpung nasa lutuk tur erawh a veng thei a, HIV positive- te chuan treatment tha tak a la thin tura a duh thu a sawi bawk.

Pu Lalhmunsanga Hnamte chuan Quiz intihsiakna buatsaih chu a hlutzia sawiin HIV/AIDS natna do na kawnga thangtharten awareness an neih theihna tura ruahmanna tha tak a ni, a ti a. Lawmman lak ah duhtawk mai lo va, HIV/AIDS do na kawnga midangte fuih phurtu ni theuh turin a sawm a. Zirlai naupang kalkhawmte chu an zirlaibu ah duhtawk mai lo va, eng hna pawh thawk thei tura thiamna tak tak nei turin skill development lamah tan la a hmasawn theuh turin a chah.

Vawiina neih tak Red Ribbon School Quiz Competition hi District AIDS Prevention and Control Committee(DAPCC) leh Mizoram State AIDS Control Society (MSACS) tangkawp a huaihawt a ni.

Lawmman dawngtute -

1st Prize - Maraland Academy (Citation leh Rs.5000)
2nd Prize - Southern Comprehensive English Academy (Citation leh Rs.4000)
3rd Prize - ECM Higher Secondary School (Citation leh Rs.3000)
Consolation Prize - Education Vaih RMSA, (Rs.2000)

School participate dangte hnenah pawh Rs.500 theuh hlan an ni a, District Level-a pakhatna - Maraland Academy hian State Level-ah Siaha District ai an awh dawn a ni.