1786/2023-2024

Khawzawl, 7th September 2023: Vawiin khan Tuichang bialtu Deputy Chief Minister Pu Tawnluia chuan Khawzawl Zuchhip Venga Deputy Commissioner of State Tax Office chu a hawng.

Hawnna inkhawm Khawzawl Zaingen Venga neihah thu sawiin khuallian Pu Tawnluia  chuan Khawzawl District-in Deputy Commissioner of State Tax Office-a nei thei ta chu lawmawm a tih thu a sawi a. Taxation Department chu sawrkar tana sum la luttu department pawimawh tak a nih angin, sawrkar pawhin a ngaipawimawh a ni, a ti. Sawrkar kum liamta 2022-2023 chhunga cheng Vaibelchhe 1020 zet chhiah an la khawm thei chu ropui a tih thu Deputy CM hian a sawi bawk.

Deputy CM chuan vawiina hawn tak Deputy Commissioner of State Tax Office chu Khawzawl District fu ke kim zelna kawnga thil pawimawh tak tur a ni tiin, District mipui ten sawrkar an rinna kaltlanga an thawhchhuah a ni, a ti. Pu Tawnluia chuan mipuite harsatna turin sawrkarin chhiah khawn a tum lo thu sawiin, dan awmsa hnuaia chhiah tha taka pek erawh khua leh tui tha te awmdan tur a ni, a ti bawk. Mizoram sawrkar chuan mahni kutkawih ngeia intodelh tumin, he mi kawnga mumal zawka inrelbawlna kalpui nan Resouce Mobilization Department thar a din thu pawh he hunah hian a tarlang. Deputy CM chuan Khawzawlah District Office tam tak hawn a ni tawh tih sawiin District Local Administration Office (DLAO) leh District Transport Office (DTO) hawn tuma hma lak mek a nih thu a tarlang a. Revenue Department pawh mumal zawka a kal theih nan sawrkarin hma a la mek zel a ni, a ti bawk.

Addl DC Pu Lalfakzuala pawhin thu sawiin Khawzawl District-ah office thar hawn theih a ni leh ta chu a lawmawm hle a ni, a ti a. Mizoramah kawngpui leh rel kawng thar sial mek zel a ni tih tarlangin, he mi kaltlang hian ram chhunga sum leh pai che vel pawh a pun zel a beiseiawm a ni, a ti a. Sawrkarin hmasawnna hna a thawh zel theih nan Taxation Department pawimawhna chu a la lang dawn chauh a ni, a ti bawk.

Commissioner of State Tax Pu R. Zosiamliana chu he hunah hian technical report pein, Taxation Department chanchin leh hmalakna hrang hrang te a tarlang a. Taxation Department hi May ni 20, 1988 khan Excise Department atangin a indang a. Tun dinhmunah Commissioner of State Tax hnuaiah Zone sawmpali - Aizawlah zone pali leh District dang 10 ah zone pakhat theuh Deputy Commissioner kaihhruainain an awm mek a ni. Kum 2023 chhungin Mamit leh Siahaah Deputy Commissioner Office leh Staff Quarter hawn a ni a, Lungleiah Office leh Quarter sak mek a ni bawk.  Taxation Department hian GST, VAT, GST huam loh Petroleum Tax leh Profession Tax te lakhawmin,  tunhnaia kum nga chhunga sawrkarin chhiah khawn tur a bituk (target) chu an khum ziah a ni.

Inkhawm hi Taxation Department Secretary Pu H. Lianzela chuan kaihruaiin inlawmna thu a sawi a. Sawrkarin mipuite hnenah thil tam tak a pe a, mipui ten an tih ve tur chhiah pek kawngah vawiina hawn tak office chuan awlsamna thlen ngei se a duh thu a sawi a.Joint Commissioner of State Tax, Pu Lalnunzira Ralte chuan lawmthu sawiin inkhawm hi a khar a ni.