1553/2022-2023
Khawzawl, the 11th August, 2022: Khawzawl District Treasury Office thar, Khawzawl Vengthar a mi chu vawiin khan Deputy Chief Minister Pu Tawnluia chuan a hawng. Deputy CM hi Veterinary, Fishery & Sericulture Board Vice Chairman Pu C.Lalmuanpuia, MLA chuan a tawiawm a ni.

Khuallian Deputy Chief Minister, Pu Tawnluia chuan Khawzawl District-a Treasure Office a nih tur ang taka hawna hna thawh a ni thei ta chu lawmawm tiin, Covid vangin rei tak hnathawh theih a ni lo a, post ruak hnawhkhat zung zung theih a ni loh avangin Champhai TO chu post chelhkawp tura ruat a ni, a ti a. District puitlin a nih theihna tur leh hemi hnua hmalakna hrang hrangte tarlangin, vawi leh khatah mamawhte puitlin vek theih a ni lova, muangchangin a lo thang chho zel dawn a ni, a ti bawk.

Treasury Office a awm theih nana bultumtu Finance Department changtu CM leh Official-te chungah lawmthu sawiin, Treasury Office chu pawisa khawihtu an nih avang hian an pawimawh em em a, security tha pek mai bakah mipui pawhin kan ngaihvenpui a tul takzet a ni, a ti a. Thawktute tanpui leh tawiawm kawngah khawtlang mipuite theihtawp chhuah turin a chah a ni.

Hrileng vanga nunphung buaiin sum harsatna thlenin thawhchhuah tur pawh thawh chhuah theih a nih loh thu leh chhiah pawh hmuh tlem a nih thu sawiin, tun hnaiah CSS sum hmuhte central sawrkar-in pe chhuak rang turin min tih avangin sum harsatna kan tawk nasa a, heng sum pekchhuahte chu hmasawnna atana hman vek tur a ni tih kan hriat a tul a ni, a ti a. Sawrkar hnathawkte hlawh pek mek a ni a, la pek theih lohte pawh reiloteah pek zel tum a ni, a ti bawk a. Office lama chinfel turte tihfel a nih veleh SEDP hamthatna dawng tura thlante hnenah tanpuina sem chhuah tum a nih thu a sawi bawk.

District Treasury Officer tarlan dan chuan kum 2019 ah RBI leh Accountant General hnen atangin Treasury Office hawng turin phalna dil a ni a. Hetih rual hian post hrang hrang awm theih nan hmalak niin, kum 2019 tawp lamah RBI leh AG te phalna hmuh a ni a. Kum 2020 ah Covid-19 vangin rei tak hna a khaihlak a, hetih rual hian office awmna tur leh quater awmna tur hmunhma nghette zawn reng a ni bawk a. Kum 2020 August -September thlaah khan bungrua dah fel a ni tan a ni. Security Press, Mumbai-ah cheque siam phalna dil niin, kum 2021 March khan phalna hmuh a ni a. Hun reiloteah Online leh Treasury Compact Software hman theih beisei a ni.

He hun hi Pu H.Vanlalhuma, Chief Controller of Accounts (CCA) chuan kaihruaiin District Treasury Officer Pu Lalchhuanliana Sailo hnen atangin report ngaihthlak a ni a. Pu C. Lalmuanpuia, MLA, Veterinary, Fishery & Sericulture Board Vice Chairman leh Bawrhsap Pu C.C. Lalchhuangkima te hnen atangin thusawi ngaihthlak a ni a. Pu Lalchhuanliana Sailo, District Treasury Officer-in lawmthu sawiin hun a khar a ni.

Treasury Office atan hian Khawzawl Vengthara Pu WC Thandawla in chu luah hawh a ni a. A bultan nan tun dinhmunah thawktu Treasury Officer Champhaiin a kawp a, AO, AAO, LDC leh Fourth Grade pakhat theuh an awm a ni.