2046/2023-2024

Khawzawl, 28th September 2023: Vawiin khan Deputy Chief Minister, 22-Tuichang AC bialtu ni bawk Pu Tawnluia chuan a bial chhung a khaw pahnih Chalrang leh New Chalrang a tlawh.

New Chalrang Community Hall-a inkhawm tawi buatsaihah Pu Tawnluia chuan bialtu a nih anga hmalakna a neih te hmuh theih a a awm chu lawmawm a tih thu a sawi a. Lakhuihthei chingtute hma ngaiin,   Sialhawkah lakhuihtheih sawngbawlna (processing plant) buatsaih mek a nih thu a tarlang a. Kalkhawmte chu ram leh hnam tana rawng an bawlna kawngah mizo hnam thinlung tungdingtu ni zel turin a chah bawk a ni.

Inkhawmah hian New Chalrang khaw chhungah hmasawnna hna cheng nuai 190 man chuang thawh a ni tawh tih tarlan a ni a. Heng zingah hian Chalrang leh New Chalrang ni zung chakna hmanga tuilakna (solar pumping), tui dahkhawlna (reservoir) pathum litre 250,000 dawng te a tel. New Chalrang VCP Pu FB Ramtharnghaka chuan inkhawm hi a kaihruai a ni.

New Chalranga hun a hman zawhah Deputy Chief Minister hian Chalrang panin, Chalrang Community Hall-a inkhawm tawi a puala buatsaihah a tel chhunzawm a. He hunah hian Pu Tawnluia chuan thu sawiin sawrkarin kawng hrang hrangah thalaite hmakhua ngaiin hma a la a ni, a ti a. Heng hmalakna zingah hian zirna (education) chu sawrkarin a ngaihpawimawh ber te zinga mi a ni tih sawiin Cabinet meeting neih zawh takah sikul engemawzat dinhmun chawisan a ni tih a tarlang a. Thalaite chu ram leh khawtlang hruaitu tur an nih angin, taimakna leh thahnemngaihna nena an nun hmang chho zel turin a chah nghal bawk.

Chalrang Community Hall-a hun a hman zawhah Deputy Chief Minister hian Vangtlang a pan ang a, Vangtlang Water Supply Scheme leh Community Hall hawnna hun khuallian niin a hmanpui ang.