2047/2023-2024

Dated Serchhip, the 28^th September, 2023: Vawiin khan Er. Lalrinawma, Social Welfare & Tribal Affairs etc. Minister chuan Chhiahtlang Chhim Veng Branch YMA Silver Jubillee lawmna chu khuallian niin a hmanpui.

Khuallian chuan thusawiin kan rama pawl lian leh pawimawh tak YMA tha taka a kal zel chu lawmawm a ti a, Chhiahtlang Chhim Veng Branch in kum 25 lai an lo thleng ta chu a lawmpui thu a sawi. Tun hnaiah Uniform civil code sawi rik ni thin mahse kan remna thu ziahah khan Mizoram Legislative Assembly in a pass loh chuan pawm a ni lo ang, tih a nih avangin huaisen takin kan tang ngam a, hun kal tawha kan tawrhna nasa tak kha a thlawn lo a ni tih hi kan hriat thar leh a tha a ni, Minister chuan a ti. Khawvel a zim tial tial a, chu chuan hnam tenau zawkte a nek ral tial tial a, keini hnam tlemte hi kan boral loh nan keini ho hi nghet taka kan din tlat zel a ngai a; kan pipute nunzia kan chawi nun zelna pakhat atan Mizote Kut pawimawh tak mai Mim Kut pawh hman thar leh tuma hmalak mek a ni, Er. Lalrinawma chuan a ti a. Kan hnam nun leh ziarangte hi a bo chuan hnam bo kan ni mai dawn a, kan hnam kan ngaihsan a, kan bungruate kan hlut deuh deuh a tul em em a, hnam dang aiin kan dawihzep bik lo tih hre tharin, YMA pawhin kan hnam nun leh ziarangte i vawnghim tlat zel ang u, tiin kalkhawmte a chah a ni.

He hunah hian Pu K. Lalrintluanga, Secretary chuan report pe in Chhiahtlang Chhim Veng Branch YMA chu Ni 17 January, 1982 (Pathianni) ah Chhiahtlang Branch hnuaiah Section F ni tura din a ni a.  January ni 29, 1998 ah Chhiahtlang Branch hnuaia Section hrang hrangte chu Branch puitlinga dah an nih angin Chhim Veng Branch tih a lo ni ta a ni, a ti.

Chhiahtlang Chhim Veng Branch YMA ah hian kum 2023-ah Member Mipa 254 (Life member 13) Hmeichhia 101 (life member 1)  an awm a,  member zawng zawng 355 an awm mek a ni.

He hun hi Pu C. Thanvawra, President Branch YMA in a kaihruai a. Upa KL Pakunga, Adviser chuan member chatuan ram pantate sunna hun a hmang a. Khuallian hian Jubille lungphun a hawng nghal bawk a ni.