2048/2023-2024

2023 Mimkut thla ni 28: Vawiin khan Kolasib District chhunga Saiphai khuaa Forest Rest House sak thar chu Mizoram sawrkara Environment, Forests & Climate Change (EF&CC) Minister Pu TJ Lalnuntluanga'n a hawng.

EF&CC Minister Pu TJ Lalnuntluanga chuan Saipum Forest Range, Saiphai Range Complex-a Forest Rest House sak thar banga chhinchhiahna lungphek (inaugural plaque) khuhna puanzar pawt hawngin, Forest Rest House thar chu a en kual nghal a. Forest Rest House thar chhunga a hawnna inkhawm buatsaihah thu sawiin, Minister Pu TJ Lalnuntluanga chuan Saiphaia Forest Rest House thar hawn theiha peih fel a ni ta chu lawmawm a tih thu a sawi a. Saiphai Forest Rest House sak chu Bialtu MLA Pu Lalrinsanga Ralte ṭhahnem ngaihnaa bul ṭan a nih thu sawiin, a puitlin nana Mizoram sawrkar hotute, EF&CC hotute leh Kolasib Forest Division-a thawktute hma laknaah lawm thu a sawi a. Rest House thar sak chu a thawktute hna thawh ṭha hlea a hriat thu sawiin, lawmawm a tih thu a sawi a. Politician leh sawrkar hna thawkte zingah hlemhletna thila inhnamhnawih duh lo, dik tak leh ṭha taka hna thawh duh mi tam tak an awm tih sawiin, mipuiin politician leh sawrkar hna thawkte an thlir danah ngaihdan he deuh awm sa ṭhin chu ṭha a tih loh thu a sawi a, mi dang sawisel leh ep zawng ni lovin, a ṭha zawnga infuihna leh an thil tih ṭhat fakna ri tam se, chu chuan thawktuteah phurna leh hna ṭha thawh zel duhna rilru a tuh ang a, khawtlang titiah pawh ngaihdan ṭha leh ngil a rik tam chuan ram pawh a ṭha zawnga a ṭhan ngei a rin thu a sawi.

Minister Pu TJ Lalnuntluanga chuan a chan department hrang hrang hnuaia Serlui Bial bial chhunga hma lakna awmte tar langin, Bialtu MLA ṭhahnem ngaihna avanga hma lakna puitling ta leh hmachhawp eng emaw zat a awm thu a sawi a. EF&CC hnuaia Mizoram chhunga hmasawnna hna thawh hrang hrangte tar langin, Serlui bial chhungah pawh eco-tourism tihlar nan Pualreng Wildlife Sanctuary-ah nungcha che tla thlira ramvahna (jungle safari) kalpui tum a nih thu leh khawpui tana chuap, boruak ṭha siamtu ramngaw din tura Nagar Van leh Nagar Vatika hnuaia hma lakna tur ruahmanna pawh a kal mek thu a sawi a. Khawvel sik leh sa danglam zelah chenna tlak ram siam turin mi tin ṭan ho a ngai tih sawiin, sik leh sa nuam zawk siam turin ramngaw a pawimawh a, ramngaw siam tura thing phun leh a awm sa humhalh kawngah te, lui tui humhalh leh nungcha humhalh kawngah te theih tawpa EF&CC thawhpui turin mipuite a ngen a. EF&CC hnuaia boruak ṭha siam tura ramngaw siamna kawnga hma lakna kal tlangin eco-tourism lamah leh carbon credit chungchangah pawh ram tan sum hnar ṭha tak a awm thei dawn a ni, a ti.

He huna khual zahawm, Serlui bialtu MLA, Rubber & Allied Crops Development Board Vice Chairman Pu Lalrinsanga Ralte chuan Saiphaia Forest Rest House changtlung tak sak a ni chu lawmawm a tih thu sawiin, hma laksaktu Chief Minister leh EF&CC Minister chungah leh EF&CC hotute leh thawktute chungah lawm thu a sawi a. Saiphai chu ramri depa awm a nih avangin mikhual pawimawhte thlenna tur khualbuk mamawhna a sang hle tih sawiin, EF&CC-in Rest House an dah chu a lawmawmin, khawtlang tan pawh thil chhinchhiah tlak tak a ni, a ti a. Department-in khawtlang an duhsakna chu hria a, ṭha taka anmahni thawhpui zel tur leh Forest Rest House enkawlnaah pawh dimdawih taka enkawlpui turin khawtlang mipuite chu a chah a ni.

He hun hi Kolasib Forest Division-a Assistant Conservator of Forests Pu Thanliana Hauhnar chuan a kaihruai a. Upa Laldawngliana, Saiphai chuan hunserh hmangin, Kolasib Forest Division-a Divisional Forest Officer Pi Margaret Lalramchhani chuan technical report a pe a. Saipum Range Officer Pu Marcellas Hunlawmawma'n lawm thu sawiin hun a khar a ni.

Saiphai Forest Rest House hi EF&CC Department hnuaia Maintenance Fund aṭanga sum hmuh ₹ nuai 20 senga sak a ni a. March ni 7, 2023 khan sak ṭan niin, August ni 4, 2023-ah sak pum a ni a, a chhung chei zawng zawng nen September ni 27, 2023-ah zawh fel a ni a. RCC-a sak niin, pindan pali-ah ṭhen a ni a. Mutna pindan pahnih bakah, ṭhut khawmna pindan leh choka te a awm a. Changtlung takin a chhung chei a ni bawk.

Vawiina Saiphai Forest Rest House thar hawnnaah hian Kolasib Forest Division-in Kolasib District chhunga tui savate chhinchhiahna lehkhabu an buatsaih, "Waterbirds of Kolasib" tih chu EF&CC Minister Pu TJ Lalnuntluanga chuan a tlangzarh nghal a. He lehkhabu hi Kolasib District Honorary Wildlife Warden, Govt Kolasib College-a Zoology Department Associate Professor Pu Christopher J.Z. Lawlor, Kolasib Divisional Forest Officer Pi Margaret Lalramchhani leh Kolasib Forest Division-a Assistant Conservator of Forests Pu Thanliana Hauhnar te buatsaih a ni a. Phek 50-a chhah niin, a chhungah Kolasib District-a tui sava leh lui kama cheng chi sava chi hrang hrang 52 thlalak fiah ṭha tak, a bu buatsaihtute lak ngei leh a sava hming leh chanchin tawi te a chuang a ni.