2049/2023-2024

Khawzawl, 28th September 2023: Vawiin khan Deputy Chief Minister Pu Tawnluia chuan Vangtlang Water Supply Scheme leh Vangtlang Community Hall a hawng.

Vangtlang Water Supply Scheme (Solar Pumping) hi Jal Jeevan Mission 2021-2024 hnuaiah cheng nuai 320 (₹3,20,23,000) senga siam a ni a. November ni 9, 2022 khan hna thawh tan niin, zawh hun tura ruat November ni 9, 2023 hmain peihfel a ni ta a ni. HS Construction ten Solar Pumping siam hna hi an thawk a; Sihpui Lui tui ni zung chakna hmanga lak niin nitin tui litre 37,000 pump chhuak thei tur a duan a ni.  Sihpui lui atanga khawchhunga tui dahkhawlna hi meter 349 a thui a ni a, mipui 700 chawm zo tura ruahman niin, stage hnih a then a ni a.Stage-I leh Stage-II te hi solar panel 17kWp a chak ve ve a thuam niin, tuikhuah litre 40,000 ve ve chhawp an ni a, khawchhungah hian tuikhuah pahnih - main reservoir litre 50,000 a lian leh service reservoir  16,000 siam a ni bawk. Hei bakah hian Vangtlang tui lakna thin ‘Kawlkhuma Kai’ thawm that (repair) tel a ni.

Hawnna inkhawm hi Vangtlang Community Hall tualah neih a ni a, Vangtlang Branch YMA leh school hrang hrang ten hnam lam chi hrang hrang an entir bakah MUP aiawh hnen atangin Hlado chham ngaihthlak a ni bawk.

Lawmna inkhawm Vangtlang Community Hall-a neihah thu sawiin Pu Tawnluia chuan Vangtlang khua chuan hun lawmawm tak a tawng mek a ni tiin, hmasawnna an hmuh thenkhat - in tina tui pek te, Community Hall thawmthat te leh Vangtlang High School Lumpsum Category C-a hlankai an nih thu te a tarlang a. Vangtlang atanga Tuipui lui inkar kawng laihna tur cheng nuai 10 bakah Vangtlang Community Hall cheithatna tur cheng nuai 5 sanction hmuh thuai a beiseiawm tih a tarlang bawk.

Tuichang AC bialtu ni bawk Pu Tawnluia chuan khawvel changkang zelah Mizo hnam thinlung put zel a pawimawh thu sawiin, kalkhawmte chu mahni hma zawn theuhah hnam rilru pu theuh turin a chah a. Mizoram sawrkar chuan thalaite changkan leh hmasawnna turin hna a tam thei ang ber thawh a tum a ni, a ti a. Zirna leh infiamna kawnga thalaite chher chhuah chu a pawimawh hle ni a a hriat thu a sawi bawk.

Khawzawl Addl. DC Pu Lalfakzuala pawhin he hunah hian thu sawiin, Vangtlang khua chu khaw hlun tak Lushai Hills Bawrhsap pathumna AW Davies-a’n 1893-94 annual report-a a thailan tawh an nih thu a sawi a. Vangtlang khua chu ziak leh chhiar thiam tamna an nih mai bakah faina lama entawn tlak khua an ni chu fakawm a tih thu a sawi bawk.

Inkhawm hi Er. Thanchungnunga, SE, PHED chuan kaihruaiin,Er. Eliza Vanlalpeka, SDO, PHED chuan technical report a pe a, Vangtlang VCP Pu Khawtinkhuma pawhin thu sawina hun a hmang a. Er. Liantluanga Chohte, EE, PHED chuan lawmthu sawiin inkhawm hi tih tawp a ni.